› 選擇地區
三藩市
紐約
洛杉磯
其他美國地區
香港 台灣 北美
 
2017年11月23日

操盤手札記:無買強勢股點算好 - 割柑人

明年A股入摩,勢將帶動資金流入,故明年投資重點係A股。
資料圖片

十年又一條好漢!2007年10月30日恒指攀上31958高峰,2008年10月27日碌落10676谷底,十年過去,終於重上三萬關!恒指昨日收報30003,強勢股升得多要唞氣,而且挨年近晚獲利情緒彌漫,後市能否守穩三萬關,要睇落後藍籌有冇力上;就算大市調整,十天線料有支持。
港股過三萬關,卻非人人賺錢。今年升勢只集中喺「大隻佬」,睇大型股指數升41%,中型股指數升33%,小型股指數升17%,創業板指數更跌26%就知。如果基金經理今年未有重倉騰訊(700)、平保(2318)、吉利(175)等幾隻藍籌,非但跑輸大市,甚至會輸錢。
點解資金買大唔買細?當經濟增長放緩,尤其喺加息周期,現金流穩定、融資成本低嘅大型股,比起現金流唔穩定、融資成本高嘅小型股,顯得更具優勢。喺跑輸大市嘅壓力大過絕對回報壓力下,資金就會被逼買入大型股,以平衡風險同回報。中外股市都有咁嘅現象。
所謂「南騰訊、北茅台」,當今股壇最強嘅,分別係中、港股王茅台同騰訊。不過,內地股市係計劃股市,茅台個半月間升穿500、600、700三關,大行目標價鬥牛,隨即被官媒插低。阿爺要慢牛,你玩鬥牛,咪一劍劍插落嚟囉!
今年無買強勢股,難免跑輸大市,與其望股興嘆,不如着手明年部署。摩通、瑞銀近日都出報告,睇好明年A股表現。摩通睇明年底MSCI中國指數見105,最牛見120,潛在升幅為17%及33%;瑞銀則睇明年MSCI中國指數同滬深300指數,分別見102同4450,潛在升幅為13%及7.4%。
明年A股入摩,勢將帶動資金流入。中金估計未來5至10年,外資每年流入資金2,000至4,000億元人民幣。本欄8月初已指出:「明年投資重點係A股,不妨開始建立A股倉……怕揀錯股,可揀A股ETF或A股基金,亦可揀被視為A股proxy嘅內險股。三大A股ETF(2822、2823、3188),8月至今分別累升15%至20%,跑贏恒指同期嘅10%升幅,仍為逢低收集之選。

割柑人
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載