› 選擇地區
三藩市
紐約
洛杉磯
其他美國地區
香港 台灣 北美
 
2017年12月01日

知己知彼:Bitcoin老散心路GPS - 風吹知

當越來越多國家及投資者接受並相信Bitcoin,佢就會變得越有價值。資料圖片

隔晚美國科技股大挫,連累港股亦滿江紅。騰訊(700)跌超過3%,「騰指」全日跌幾百點都好正常,當然其他科技股亦冇一倖免。手起刀落,近日頗受追捧嘅近牛、call輪通殺。與此同時,昨晚創歷史新高嘅Bitcoin同樣急回,相信又震走咗一批炒家。
Bitcoin? 我都有炒,8月份買入小小玩吓,中途曾加注又沽貨,但在今個月中7,000美金附近價位全數沽出。所以我很明白散戶炒Bitcoin嘅心態,由3,000美金開始唔信佢仲有得升,佢就升到4,000美金,你冇得唔信佢強勁升勢。到你真正落場玩,就更加堅信長升長有,就如2017年諾貝爾經濟學獎得主美國經濟家Richard Thaler提出過嘅「損失意識」或「稟賦效應」理論,當你得到一樣嘢後,會認為佢比未得到之前更有價值,所以點解咁多人買入股票後唔捨得沽,買Bitcoin亦如是。
當Bitcoin由3,000幾美金升到咗一倍,升到你懷疑人生,你仲會炒逢兩進一嘅港股咩? 當然all in炒Bitcoin啦。直至今個月初,Bitcoin崩盤,短短5日就累跌一兩千蚊美金,挫至5,000幾美金,相信好多人都被震走。雖然之後回升,有人選擇翻兜,當然亦有人畏高,包括我。而重投Bitcoin懷抱嘅勇者,抵佢食到由8,000升破10,000美金呢個浪。
點解Bitcoin呢期不斷破頂爆升,其實好多時都冇解,如果一定要搵個原因,主要因為芝加哥商品交易所(CME)上月底宣佈,今年底前將推出Bitcoin期貨。Bitcoin比股票更受市場消息及政策影響,所以今年當日本認受Bitcoin後,即錄得大幅上升。虛擬貨幣最需要嘅就係投資者嘅認同,只要越來越多嘅國家及投資者接受並相信Bitcoin,佢就會變得越有價值。

風吹知

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載