蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年12月05日
馬上成為壹會員

金手指 :是時候開長Put了 - 孫柏文

全球股市超貴,開長put有錢贏好有信心。 資料圖片

2007年11月3日,中國國務院總理溫家寶,正出訪中亞烏茲別克。
嗰朝,隨團採訪嘅香港傳媒,十個有九個記者都未起身。晨早流流,溫總着住運動衫準備離開酒店去跑步之際,被來自有線電視嘅記者截住,問有關資金自由行、港股直通車幾時會開。
唔知係咪做運動嘅人,最忌就係拉好筋後、做運動前俾人阻頭阻勢。溫總就咁一句:「沒了。」作回應,全面叫停。成為香港股市歷史,唯一一次有明確落車嘅訊號。之前曾超三萬二點嘅恒指,翌日收28942點。
十年後嘅今日,恒指又超三萬後喺當時嘅位置,結果會否唔一樣?
習大大又坐穩後,又來勒緊大陸超泡沫級貨幣供應。加埋花旗國都因參議院繼眾議院後,通過稅務方案,最後一個好消息都出埋。所以禮拜二孫柏文會開put。係長put。
唔知會唔會再升,不過市場焦點,將會快速移去世界各國央行收水之事。以前只要唔印新鈔票,個市即呆。來緊一年,唔好話印新鈔,世界各地嘅央行話將會淨減已印嘅鈔票。以現今全球股市超貴,我對開長put有錢贏好有信心。
有冇目標價?冇。我只係睇啲央行,特別係聯儲局幾時淆底,放棄收緊,再一次重踏印鈔瘋狂之路。為世界變得更扭曲、人心政治更不穩。
我反唔反對呢個印鈔政策?當然反啦。反咗十年。不過過去十年嘅教訓係,反對冇人會欣賞,所以賺咗先算。英雄是沒有好下場的,更不要說烈士。

孫柏文
獨立股評人
http://fb.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載