› 選擇地區
三藩市
紐約
洛杉磯
其他美國地區
香港 台灣 北美
 
2017年12月11日

中環在線:
滙豐推face ID勸青春期 雙胞胎 勿用 - 李華華

銀行近年推指紋認證,登入手機銀行功能比以前方便好多,不過Apple嘅iPhone X取消咗指紋認證功能,但新增咗人臉辨識(facial recognition),滙豐決定跟機,不過戴咗個頭盔,就係正值青春期嘅,或者有雙胞胎、有似樣嘅兄弟姊妹嘅你,就最好唔好用喇。
iPhone X嘅人臉辨識功能喺國外都有唔少被破解嘅例子,畀人開到電話唔緊要,開到銀行戶口就大件事,所以滙豐喺使用條款(T&C)都好小心,提醒要做好預防措施,防止欺詐。
滙豐寫到明,如果閣下有雙胞胎或者長相相似嘅兄弟姊妹,就千祈唔好用人臉辨識功能作為認證之用;另一樣係如果閣下正值青春期(adolescence),由於臉部特徵仍然處於「迅速發育」嘅階段,都係唔應該用嘅。

宜用App化流動保安編碼

咁唔用嘅話,又有咩選擇呢?滙豐就話,可以考慮吓用流動保安編碼,密碼以獲取保安編碼代替,即係已經「App化」咗嘅保安編碼器,登入手機銀行戶口都方便嘅。
成日提醒銀行注重風險嘅金管局又點睇呢?發言人就話銀行用呢類生物認證科技前,要仔細評估有關技術嘅操作風險,而且銀行需要通過雙重認證,先可以進行存款轉賬等高風險交易喎,即係暫時都好安全啦。

李華華

mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載