› 選擇地區
三藩市
紐約
洛杉磯
其他美國地區
香港 台灣 北美
 
2017年12月14日

中環在線:大學生度橋畀滙豐 - 李華華

5位學生哥創辦嘅app叫做InstaSure,唔知滙豐會唔會幫襯呢?

銀行戶口保安好緊要,滙豐早前舉辦咗個應用程式(app)比賽,搵咗班大學生一齊去度橋,諗點樣提高客戶安全意識,其中由城大、港大組成嘅團隊,創辦一個「溫馨提示app」拎到冠軍,唔知滙豐一姐施穎茵(Diana)會唔會買佢哋個服務呢?

5位學生哥創辦個app仲未面世,但已經有名,叫做InstaSure,概念就係要求銀行量化個人戶口嘅安全程度,100%即係最安全,唔使做任何動作;但如果只係得20%,app就會主動提醒用家做嘢,例如提供地址證明、修改密碼、回答個人問題等,提升安全程度。

創辦人之一、讀緊城大year4嘅Samson話,就算安全程度係0%,個app都唔會有權力去暫停戶口,只係溫馨提示用戶咁話。至於滙豐有冇話想買呢個服務呢?佢就話留畀滙豐決定。

Diana就冇講話會唔會幫襯,只係講話今次比賽,為銀行提供咗嶄新嘅構思,又話參賽隊伍水準非常高……咁即係都有機會支持吓學生哥啦?

另一邊資深啲嘅初創組別,就係由一個叫ecSAFE嘅方案勝出,概念就係創立一個下載銀行產品積分、現金回贈嘅錢包app,再將呢批零碎嘅錢包裝成現金禮券,製造誘因等人下載,順便要求客戶核對資料,提升戶口安全咁話。今次比賽,大學生得獎隊伍拎到10萬元,初創企業就有30萬元。

李華華

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載