› 選擇地區
三藩市
紐約
洛杉磯
其他美國地區
香港 台灣 北美
 
2017年12月14日

操盤手札記:稅改加息 誰最得益 - 割柑人

特朗普稅改,刺激經濟增長,金融股率先受益。資料圖片

上周美國《時代》雜誌選出「#MeToo」反性侵運動嘅「打破沉默者」為本年度風雲人物,美國總統特朗普屈居其後未能蟬聯。諷刺嘅係,本周即有三名女子響應「#MeToo」,再翻特朗普性騷擾舊賬;舊年大選至今,已有17名女子指控特朗普,「#MeToo」儼然成為特朗普嘅催命符!
醜聞纏身嘅特朗普,仲有另一道催命符「通俄門」。喺「通俄門」越揭越臭之際,特朗普上周三突然確認耶路撒冷係以色列首都,籌備搬大使館,全世界嚇一跳。呢招可謂一舉三得:既可轉移視線;又可為競選承諾找數;更可借中東亂局,做軍火生意,賺石油美元。
市場對中東局勢未致太擔心,本周係超級央行周,有十幾間央行議息,涉及全球四分之三經濟體,戲肉係美國聯儲局喺香港時間周四凌晨三時嘅決議,同日仲有歐洲、英國、瑞士央行出場。美國今次議息,係今年最後一次,明年美息走勢,要睇特朗普稅改有幾巴閉。
特朗普稅改,其實係一套組合拳,對內減稅──減收企業稅、個人稅;對外則加稅──加徵反傾銷稅、反補貼稅。稅改刺激經濟增長,亦刺激通脹上升,市場原本預咗美國明年加息三次,但稅改過關後,就估四次。加息本來不利股市,但有減稅跟尾兼預期經濟加速復蘇就唔同。
經濟復蘇,金融股率先受益,尤其銀行股,具美國業務嘅國際金融股匯控(005),議息開估前就抽升2%。北水中嘅大水喉平保(2318),近日亦大手掃匯控至5.01%,成第二大單一股東。
藍籌之中,具美國業務盈利貢獻嘅萬洲(288)都受惠稅改。萬洲係豬肉股,首三季收入近六成嚟自美國。瑞信預計,若美國企業稅率由35%降至20%,萬洲盈利可望提升10%;美銀美林、中金亦唱好。該股現價8.77元,考慮到年尾交投將轉靜,入市不急一時,可候回吐至20天線吸納。

割柑人
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載