› 選擇地區
三藩市
紐約
洛杉磯
其他美國地區
香港 台灣 北美
 
2017年12月16日

周末專題:多處漏用防水物料
Capri特色戶 外牆易滲水

會德豐(020)將軍澳Capri加兩成管理費才有座頭保安引起批評,交樓質素都「做啲唔做啲」,資深驗樓師賴達明驗收一個特色單位時,發現主人房窗外與外牆銜接位竟漏用防水物料,出現罅隙,玻璃幕牆又有兩個足夠插入螺絲批的窿位,一旦打風落雨,房間勢將濕淋淋,批盪剝落勢在必行。
記者:陳家雄

相關新聞:一房單位喪叫租2.5萬

業主以近800萬元買入一個特色單位,兩房間隔,另連一個平台。客飯、睡房及廚房油漆批盪手工佳,平滑鋪實沒瑕疵,來去水也沒滲漏,去到廁所門前卻失手,燈掣裝甩,甩到徒手拎得開。

玻璃幕牆有窿位

明哥走進廁所,雖然來去水沒有問題,但他指出:「廁所有4個問題:鏡櫃膠邊做啲唔做啲。地下遮住去水喉的封板可移動,有機會攝水入渠邊。而去水喉邊是無修口,現出罅隙,可見石屎層,浴室用水時容易攝水入地磚底,如果防水層破損會造成滲漏風險。最後是廁所牆邊及門框防水邊做啲唔做啲。」
走出幾百呎的平台,一眼睇到地磚至少3處顯而易見的崩裂。不過更大問題是主人房窗外牆邊,明哥發現:「主人房窗外邊嘅防水膠係無咗,由地下一路上去,係爛晒,基本上低層位置都無,中高層都係斷斷續續……爛晒!情況好明顯同嚴重,唔知留條罅來做乜。」業主搭訕稱,有同類單位業主向發展商反映,當時獲得回應「是咁的!」,明哥按捺不住怒斥:「係咁?好明顯係爛晒喎,點會係咁!」然後玻璃幕牆窗與窗的接駁位置有窿位,一支8吋長螺絲批,可以完全插入。

相關新聞:浴室木櫃發霉風險高

他認為,單位最大問題是「罅」,主人房窗外防水物料明顯做漏,打風落雨容易入水,勢將影響主人房牆身,而玻璃牆亦漏用防水膠邊現窿位,正對睡房窗台,若長期入水,窗台勢必滲漏,批盪會浮起剝落,建議業主要求發展商必須補窿。另外,單位玻璃窗崩花多,尤其是主人房的玻璃窗,已超出可接受水平,需要更換。

整體驗樓獲88分

單位外牆漏防水膠邊的滲水風險雖大,但一系列交樓工種,有10項獲90分或以上,其中慣常扣大分位,包括來去水、地台、油漆都滿分,拉高整體評分至逾88分。明哥總結,已檢驗Capri多個單位,平均得分為「8」字頭,與同區同系Parkside交樓質素相若。
會德豐發言人回應,有關上述單位執修事宜,已收到業主提交的執修列表,會安排承建商依據既定執修程序進行,詳情再另行通知業主。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載