› 選擇地區
三藩市
紐約
洛杉磯
其他美國地區
香港 台灣 北美
 
2017年12月19日

智取大市:港股二度升浪條件 - 晉佳

內地仍然想維持資金寬鬆,港股明年仍然有多一浸上升嘅機會。資料圖片

上期講到港股會有反彈,噚日A股都未算企穩,港股縮住成交先來個小彈,但升勢並不全面,主要由部份大藍籌帶動。呢刻強勢大藍籌守穩10天線之後,短線有條件升至吸引散戶再度雀躍買牛仔嘅水平,希望言中。不過,要注意一件事,融創(1918)配股第二日已經跌破配股價31.1元。呢隻由港股通持股達到已發行股本24.67%、由北水主宰程度最勁嘅股,配售接貨投資者亦幾可肯定都係大陸佬為主,配股價不堪一擊亦反映北水胃納有所減弱,希望呢種胃納減弱,亦只限於內房股。

論中線調整,估計尚未完結。原因係上證50指數3,000點作為公募基金要沽嘅水平,最老土都係要兩個元素其中一項出現改善,先能夠扭轉沽貨預期。第一,價錢變平,簡單啲講係透過股價下跌去令估值變得吸引、值博;第二,重燃盈利增長預期。因此,後市要再出現升浪,必然係透過改善盈利預期。

港股暫時見一見頂,原因係經過一年嘅工業restocking浪潮,以及內地樓市爆升過後,內地經濟開始未接到軌,步入增長放緩。11月工業增加值按年升6.1%,為年內第二低,商品類、工業相關股份近兩個月早已跌到反艇。不過,稍後要留意各工業產品銷售情況,可能係經濟小陽春嘅訊號,例如11月內地銷售挖掘機械產品13,822台,開始有回升,睇吓情況明年初會否持續。

人行調高MLF利率之後,人行噚日進行3,000億人仔逆回購,淨投放2,600億,拆息偏高之下,內地仍然想維持資金寬鬆,呢種環境下,中央要催谷明年某個時間最低限度出現經濟小陽春,難度唔算高、機會亦唔算細,於是港股明年仍然有多一浸上升嘅機會。由於內地新住宅價格升勢放緩已成定局,更有可能催化成樓換股局面。不過,一切一切要等時間發酵,中線調整,仍需時。

晉佳

https://www.facebook.com/advanceguy1/

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載