› 選擇地區
三藩市
紐約
洛杉磯
其他美國地區
香港 台灣 北美
 
2017年12月19日

大棋局:港股最後一升動力 - Mr. Tregunter

港交所打算修改上市規則,所謂改革,其實係為阿里巴巴度身訂造。 資料圖片

港股最後一升嘅動力,可能來自炒同股不同權概念。12月15日港交所收市後公佈創新板諮詢總結,打算修改上市規則,畀三類公司嚟香港主板上市。第一,同股不同權的新經濟公司,市值最少達100億元;第二,尚未有收入的生物科技公司,市值最少達15億元;第三,已在其他地方上市,來港作第二上市的新經濟公司,市值最少達100億元。
簡單嚟講,就係放寬上市門檻,畀一啲本來唔符合上市規則嘅公司可以嚟香港上市。尤其好多人都話,今次所謂嘅改革,其實只係為阿里巴巴度身訂造,相信又會掀起一股炒風。點解咁講?炒股係預期,股壇經常聽到一句話:「冇PE好過有PE」。有PE,大概計到間公司合理價值,即係有頂;冇PE,吹到間公司100年後統一全世界都可以,股價冇頂任你篤,爆咗先算。
整體經濟增長疲弱,好多公司睇佢盤數冇乜增長動力,大戶都會驚炒上去自己中伏。炒願景、炒未來嘅公司,只要每年盈利增長睇落夠勁,甚至間公司日日蝕都冇所謂,只要有人信佢前途無限,個價就有得炒。金融海嘯後聽得最多的一句話,可能係價值投資已死。死計爛計每股盈利,計現金流,計CAPM,out晒。
同股不同權即係dual-class shares,可以每股價錢一樣,投票權唔一樣,又或調轉投票權一樣,但價錢唔一樣。香港人最熟的應該係太古,有太古A(019)同太古B(087)兩隻股票,投票權一樣,太古B只係太古A五分一價錢。同股不同權係當日英資公司想在市場上吸水,但又唔想放手公司控制權而度出嚟,只不過時移世易,現在套嘢要嚟服務中國公司。同股不同權係金融市場上的貴族制,違反咗《世界人權宣言》第一條人人權利平等。平等是否適用於金融市場?不妨想想。

Mr. Tregunter
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載