› 選擇地區
三藩市
紐約
洛杉磯
其他美國地區
香港 台灣 北美
 
2017年12月22日

知己知彼:大學生唔好作死 - 風吹知

啱啱畢業嘅大學生,如果冇慈父慈母,真係唔好心急入市。資料圖片

香港樓價全球最貴、最難負擔,年輕人上唔到車問題日益嚴重。有發展商有見及此,熱心推出大學生置業計劃,首期最少不足一成,供足40年。出發點係想幫年輕人,但樓市長升長有當然大家開心,不過萬一樓市大跌,真係好心做壞事。

新世界發展(017)旗下屯門新盤天生樓,料預留15伙助年輕人首次置業,首期最少只需手7.5%,25至35歲人士符合資格即可申請。最細個單位422呎,折實價近588,入場費44萬。以現時瘋狂樓市嚟睇,價錢唔貴。可負擔、有急切住屋需要而又符合資格人士,絕對可以考慮。不過,如你話冇慈父慈母、啱啱畢業嘅大學生,勸你唔好心急入市。

年輕人上唔到車係一個問題,不過呢度講緊嘅年輕人並唔係指十零廿歲,又或者啱啱讀完書嘅人。因為佢哋上唔到車係好正常,真正要人幫嘅係,出社會工作咗幾年,甚至10年,依然上車無望嘅人。

發展商一開始係打着大學生首置計劃旗號攞彩,依家醒咗,個名叫「新世代首置計劃」。大學生畢業就買樓,諗都唔好諗,有慈父母另計。剛畢業大學生或大專生,只有讀神科才有機會月入過三萬,普遍只有一萬尾或兩萬頭,學位泛濫,其實大部份都只有萬零蚊。

好多人一畢業已經孭十幾萬學債,你仲叫佢哋孭多五百幾萬樓債?頭兩年就話供萬二蚊,都可以負擔,出年或加息三次,供多千幾蚊,而日後息口只會越來越高,都仲未計樓價可能因為加息縮表一齊嚟而有機會調整返一兩成。假設你25歲起供,供40年,最後嗰30年月供升到兩萬幾蚊,真係一日未退休,一日都要供樓!難怪香港咁多學生跳樓,太絕望了。

風吹知

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載