› 選擇地區
三藩市
紐約
洛杉磯
其他美國地區
香港 台灣 北美
 
2018年01月05日

會師中環:會計話題有市場 - 神仙丁

香港會計從業員甚多,讀者基礎不俗,會計話題有一定票房。 資料圖片

首先,我必須多謝《蘋果日報》提供平台,令我能夠定期同大家分享會計大小事。
一直以來,會計於商業世界雖然重要,但於財經版所佔篇幅卻少之又少,所得注意不多。其實以會計業特性來說,都不難理解:講實用,會計跟外部世界互動性不算大,遠遠比唔上財技、技術分析、股票冧巴咁好使好用;講娛樂,會計師又十分低調,只會日日加班,完全唔似iBanker夜夜笙歌咁吸引眼球。所以就算真係能夠上報紙,通常都係屬於「醜事傳千里」嗰隻。
不過,這樣不等於會計話題冇市場。四大會計師樓加上其他中小型事務所,僱員已經過萬,另計已離職或準備入行者,讀者基礎其實不俗。大家不妨望望近年幾個冒起嘅會計Facebook Page,為數不少的Followers就證明會計話題有一定票房。可惜美中不足的是,基於Facebook嘅過濾性演算法,這些平台的受眾始終集中於會計師,導致業界聲音難以傳達,而外界要打聽行業情況又只能管中窺豹,難免令人感到有點「圍爐取暖」。
但感動嘅係,今次《蘋果》財經嘅專欄招募,為這個困局提供了一個很好的突破口,把受眾擴至外行人,同時會計業界的聲音亦能傳得更響更遠,令人振奮。由於今次是本欄首次撰稿,難免講多了開場白。下次將言歸正傳,為大家解構「四大會計師樓的加薪預期」,敬請期待。

神仙丁
《審計搵丁》負責人
http://facebook.com/AuditSlave/
本欄逢周五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載