› 選擇地區
三藩市
紐約
洛杉磯
其他美國地區
香港 台灣 北美
 
2018年01月27日

70後衝動創業 搞美容輸百萬
「以後我寧願打工」

【周末專題】
70後阿May(化名)打工十多年,儲下100萬元,創業搞美容生意,開業半年聞燶味,想打退堂鼓卻又不得要領,最旺一個月才8個客人,人均消費400元,營業額僅3,200元,連每月3.3萬元租金都交不起。死捱兩年,最終百萬血汗錢付之流水,惟有重做秘書,「以後都唔創業,我寧願打工!」
記者:陳家雄

相關新聞:創業前須考慮能力及客底

70後阿May是一名秘書,年約四十,返朝九晚五,收工鋌而走險做無牌小販。「每日做到凌晨十二點、一點,一個女仔,擺晒啲衫出嚟賣。」坦言多年來已被食環署拉過好多次,每次罰幾百元,貨物被充公。計過度過,罰錢充公還有得做,周而復始十多年,儲落過百萬元積蓄。

最旺時月入僅$3,200

幾年前去日本旅行,「試過一張床,本身有靜脈弓脈,瞓完後,隻腳鬆啲,之前係行唔到路,企5分鐘已好辛苦。好大膽同店主講,可唔可以入貨嚟香港。佢痛症、美顏、頭髮護理都得,所以就算張床咁貴都入返嚟。」那張床便是日本近年興起的岩盤浴,岩床鋪石,稱有排毒、放鬆肌肉等作用。
「投資額無諗過咁大,預60萬,諗住呢度(銅鑼灣)地點好,點知成幢嘢人流寥寥可數。裝修又超支,裝修師傅同你講咁多錢,但最終又係另一個價錢。生意額唔好,夜晚仲要繼續做小販,貼租貼人工!最好時,都係得一個月咋,試過有8個客,人均消費400元,營業額3,200元。」
無生意想跳船,曾找中間人頂讓全盤生意,她說:「問過業主代表,佢話你唔使諗,點都要完成晒成個租約。」甩唔到身,惟有死頂,「賣廣告、整facebook、街邊擺易拉架、去豪宅禮頓山派傳單,但冇效果。後期幾乎冇經營,租約第2年幾乎全年白交租。」

業主要求還原單位

回憶最惡劣時,她說:「我直情有跳樓自殺嘅衝動,舖頭曾經好worse、好worse,worse到自己都驚。」
捱足兩年,租約結束,「點知業主要我還原單位,結果裝修用咗6萬蚊,但業主代表話唔接受。」根據她和業主簽訂的租約,當中列出單位還原要求,包括牆身及地板。記者現場睇過她花6萬元委聘裝修師傅進行工程後的情況,一幅牆身凹凸不平、地台沒有盪平、廁所有條去水喉無封,並不符合租約的要求。
阿May稱:「地台不平,洗手間喉管外露,再整嘅話,裝修師傅話要多3萬元。唔整,又可能會被業主沒收按金,嗰度近10萬蚊。」單位已交回業主,截稿前,業主暫未回覆她會否沒收近10萬元按金。
回想當初明明賣衫,卻經營從未接觸的美容行業,承認一時衝動,「今次輸咗100萬元,好心痛,當買咗個經驗。經過呢次,以後都唔會創業,我寧願打工!」

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載