› 選擇地區
三藩市
紐約
洛杉磯
其他美國地區
香港 台灣 北美
 
2018年01月31日

中環在線:反擊內房主導論
陳啟宗︰港地產商身經百戰 - 李華華

陳啟宗指香港地產商個個實力雄厚有智慧。

恒隆地產(101)主席陳啟宗每次出場都唔會有悶場,噚日恒隆業績會,講到買地,佢就講番,一年前喺內地同班內地朋友食飯,席間有人「預言」,話五年之內香港地產市場係由內房主導,就算唔係玩晒,都可以話係七七八八咁話!
當時一枱人,得佢一個唔同意(因為得佢一個係香港人),不過就冇講出口,免得hurt到人喎。忍咗成年,佢噚日要爆嘞,指未來五年香港地產仲會係香港地產商主導,原因係香港地產商個個身經百戰,而且非常有智慧(佢好似讚埋自己)。

「外人嚟玩唔係咁易」

佢解釋,香港係一個獨特市場,外來人想過嚟玩唔係咁易,加上香港地產商財務好、負債低,可謂實力雄厚。佢不忙暗寸多兩句,話不到一年之前,內房不顧一切來港搶地,話口未完,一年都未夠,最近幾次中標嘅,咪又係香港地產商。咁最近頻撲水嘅海航有冇搵恒隆傾合作先?佢就耐人尋味答一句︰海航都係朋友嘅。
但唔知係咪佢去得內地多,記者用英文問問題,佢明明答緊英文,忽然間又轉台講普通話,搞到全場人呆一呆,要人提先轉番台。佢解釋話,廣東話、英文同普通話於佢冇分別喎。唓,又係順便讚自己。

李華華
mailto:LiWaWa@AppleDaily.com


LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載