› 選擇地區
三藩市
紐約
洛杉磯
其他美國地區
香港 台灣 北美
 
2018年01月31日

Money Walker:美元中長期仍弱勢 - El.

美元近日雖然跟隨美債息上升而略有反彈,但長期大勢依然疲弱。資料圖片

環球貨幣戰悄然揭幕,先有日本央行行長黑田東彥拒絕承認日本央行正在減慢買債,再有歐央行行長德拉吉(Mario Draghi)於周議息後記者會上稱內部暫未討論減慢買債,藉此淡化有關預期,不過最爆嘅係美國財長姆欽(Steve Mnuchin)。
姆欽上周發表完弱美元有利美國貿易嘅言論後被要求澄清,但佢堅稱自己呢番說話「清晰」且「前後一致」。點知轉過頭就表示自己之前講嘅嘢被斷章取義,又改口話美元長期走強對美國先係最好,分明係因為高調撐弱美元一事而被照肺要補鑊。其實所謂貨幣戰,就係指透過言論左右市場對本國貨幣走強嘅預期升溫,特朗普班子屬意弱美元嘅意圖早已表露無遺,所以即使姆欽改口為幣戰降溫,市場亦明顯不被說服。
近期成日聽到有分析指美元疲弱利好港股,呢個講法筆者絕對認同。但要留意一點,就係與以美元計價嘅商品,好似黃金同石油不同,美元與港股兩者間之反向關係,其實係體現喺較中長期之上,並非美元今日跌1%,恒指聽日就會升1%。換言之,只有美元未來中長期維持弱勢,該段期間先會利好新興市場。
美匯指數已跌穿90大關,即使近日跟隨美債息上升而略有反彈,筆者認為美元長期大勢依然疲弱。原因係美國加息預期雖然升溫,但畢竟其加息周期已經走咗一半或以上,而歐元區同日本而家先開始考慮減慢買債,意味美元與其他貨幣之息差未來即使唔收窄,亦唔會擴闊太多。基於上述原因,筆者繼續對金價與非美貨幣睇高一線。

El.
http://fb.com/moneywalkerhk
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載