› 選擇地區
三藩市
紐約
洛杉磯
其他美國地區
香港 台灣 北美
 
2018年01月31日

收市閒情:「股民的話」真正解讀 - 千頌C

當一啲平時冇買開股票嘅朋友,重複出現咁問「買咩好」時,可能係造淡時機。資料圖片

港股2018年之後勢如破竹,係嘅係嘅,噚日回吐300幾點,但有一點,好明顯係「牛」氣不改──近來身邊多咗朋友入市。但如果你聽到以下說話,如果你當佢哋係朋友嘅,為佢好,我會叫你勸佢:你收手啦。
1:「買報價機?一個月,大大話話都幾嚿水。」係嘅,市靜市衰大跌市,個市真係睇都廢事,睇完多手手痕買咗嘢,仲蝕多兩錢重。今時唔同往日啦,家陣報價機真係最佳投資恩物,喺街睇住盤隨行隨買。大牛市下,為慳幾百蚊,分分鐘蝕數以十萬計嘅利潤,如果呢條數都唔肯畀,不如唔好炒
2:「今日跌咗成百點,點算好?」「定啲來。」「依家升咗4%,我係咪應該走。」「你明明睇升一成!」「但今朝升8%依家回緊呀」
以噚日為例,跌300幾點,好多買正股嘅都走夾唔唞。喂,單單係1月份,就升3,000幾點,休息是為了走更長的路,佢識回吐,呢個牛市反而仲健康。震少少落嚟就嗌「驚驚」,不如唔好炒股返去銀行收息吧。
3:「講秘密你知呀,我All in我副身家落去隻Call!呢隻股,一定會升嘅」,最怕係隻Call已回咗幾成,過多排輸埋時間值,佢再同你講,「佢一定會升返!」仲配以一個堅定眼神,人生充滿希望。聽到呢類對白,真係好心相勸佢收手,通常呢類人兄,「賭徒」已進化成完全形態。講真,喺股壇入面,炒輪證賺大錢繼而成為職業賭徒兼唔走火入魔唔輸返轉頭嘅人,真係少之又少。為佢好,叫佢冷靜吓。
4:「我想買股票呀,買咩好?」一聽呢句,就知呢位朋友平時冇買開,如果呢句說話,喺你生活圈子不停出現,你有兩個選擇,一係叫佢收手;如果佢堅持要買貨,仲大手大手咁買,為自己好,我會勸你:是時候造淡了。

千頌C
http://fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載