› 選擇地區
三藩市
紐約
洛杉磯
其他美國地區
香港 台灣 北美
 
2018年02月02日

中環在線:萬科換CEO 郁亮變主席 - 李華華

郁亮

眼見各大企業陸續派發雙糧花紅,就知又到跳槽旺季,同時都係獵頭公司幫企業搵高級人才嘅好時機。可能求才若渴,而叻人又特別多人爭,好似喺內房龍頭之一萬科(2202)做咗18年總裁嘅郁亮,噚日會見傳媒時就自爆,佢日前一宣佈唔再兼任萬科總裁同首席執行官,半夜就接到好多獵頭電話,以為佢唔再做萬科。查實睇真啲,郁亮仲繼續做萬科主席㗎!
郁亮點解咁多人爭?睇吓佢嘅履歷就知曉,北京大學經濟學碩士,1990年加入萬科,用咗11年時間就爬上公司總經理一職,係萬科創辦人王石嘅左右手,更加有「中國企業第一經理人」之稱。

大讚繼任者係「大炮」

郁亮話,舊年已經有換人做總裁嘅想法,經過多番物色,就搵嚟曾任萬科高級副總裁、投資部門出身嘅祝九勝繼任。
新舊總裁噚日齊齊喺內地現身,郁亮對繼任者有讚無彈,話兩人喺萬科共事過7年,祝總曾負責嘅資金中心部門,正正係郁亮組建。郁亮讚祝總喺公司內部開會係「大炮」(華華估計應該係勇於提意見,斷估唔係話佢「車大炮」嘅!)。
雖然祝總金融背景深厚,但佢就話,未來會加強做地產金融,但萬科唔會直接做金融。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載