› 選擇地區
三藩市
紐約
洛杉磯
其他美國地區
香港 台灣 北美
 
2018年02月12日

笑到最後:狗年投機攻略 - 高明

投資者今年攻略係,用盡自己所識嘅分析工具,確認冇死角先下注。 資料圖片

2017年係神奇嘅一年,唔需要揀股、唔需要有技巧,見升嗰隻買嗰隻,就會有錢賺。更奇嘅係,每逢轉角市,有懷疑十五十六,買股票一定係正確嘅選擇。2018年,特別係立春過後,明顯轉變,變成「疑點利益歸於現金」,稍為有懷疑,啲人沽都沽唔切。
錯咗都唔怕認:即使高明按紀律「跌就沽、升就買」,星期一已大幅減持,無奈到星期二凌晨未瞓,見美股反彈,以為港股一樣見底並重展升浪,開市見股價已升,貫徹「升就買原則」,高追三寶,點知一個鐘後發現唔對路即時止蝕離場。
當時高追都知反彈有啲條件未被滿足。通常反彈先決條件有幾個,包括跌幅夠多、市場夠恐慌,星期三開市前已有上述條件,但未滿足嘅因素係(1)時間唔夠,未足夠令博反彈嘅人心死;(2)股價低位逐級跳,升幅一個鐘高過另一個鐘。
當時高明仲以舊年嘅心態買股票,結果當頭棒喝又跌錢。高明預期,今年至少首季,股市要重展升浪,必須要達至冇合理疑點,所有負面因素清除,啲人先敢落注,同舊年有唔同。當然,人人炒股方法唔同,已經有人覺得夠平而買入,唔想阻人發達,高明唯一建議:用盡自己所識嘅分析工具,確認冇死角先下注。
返到上星期,本欄「沈判日自救攻略」文章一出,留言有讚有彈,部份留言覺得:股價下跌唔應該止賺。一個星期過去,恒指已跌3,421點,衷心希望當日留言覺得不應止賺嘅網友今日唔會太傷。我老豆成日話:通常唔買嗰個最多意見。留言嘅人,估計多數都冇買。但我憂慮,有跟開嘅讀者睇完我嘅文章,再碌落去睇留言,見留言恥笑沽貨獲利嘅人,覺得唔夠型而一直持貨。事到如今,希望大家投機當機立斷啦!
回顧雞年,高明喺應該買貨時叫買、應該沽貨時叫沽。今次係農曆年前最後一篇,高明祝大家狗年笑到最後。

高明
http://fb.com/bigricetea
本欄逢周一刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載