› 選擇地區
三藩市
紐約
洛杉磯
其他美國地區
香港 台灣 北美
 
2018年02月13日

中環在線:
百貨店上市 袁彌明有三King撐場 - 李華華

袁彌明同老公林雨陽敲鑼都不忘手拉手。

前港姐袁彌明(Erica)終於成為上市公司主席!她創辦嘅彌明生活百貨(8473)昨早喺創業板掛牌,公司收市市值3億元,按持股比例,袁彌明身家逾2億元。呢日唔只有姐姐袁彌望同佢拍住上做生意,仲有老公林雨陽、爸爸袁弓夷同哥哥袁彌昌呢三個生命中最重要嘅男人出席撐場。全家人都咁支持佢,難怪Erica笑到咁開心。

眼見囡囡一手創辦嘅公司成功上市,爸爸袁弓夷話,囡囡辛苦咗咁耐,家陣公司成功上市好開心。問到佢以前有冇特別培養囡囡做女強人,袁弓夷就耍手擰頭,話全靠囡囡自己努力咁話。至於老公林雨陽,佢同Erica糖黐豆,敲鑼都要手拉手,sweet到爆。問到林雨陽會否獎勵老婆,佢就話「日日都獎勵緊佢」。但由於之前全副心思放晒工作上,所以嚟緊初一,佢就會暫時放低香港嘅工作,同老婆旅行放鬆吓。林雨陽仲話,呢個trip已經計劃好耐,唔知林生林太係咪順便補祝埋情人節呢。
全場最開心嘅當然係主人翁Erica,佢形容自己開心又緊張。佢呢日悉心打扮,穿上「有花有葉」嘅靚裙,佢解釋條裙同公司理念相近,因為公司主要賣天然產品,而且佢鍾意着淺色,上鏡「影得靚啲」咁話,果然貪靚。

李華華

mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載