› 選擇地區
三藩市
紐約
洛杉磯
其他美國地區
香港 台灣 北美
 
2018年02月13日

操盤手札記:波動市吼回購股 - 割柑人

股市正在深度調整,後市波動難免,投資者暫宜輕倉操作,無貨就睇定啲先。
資料圖片

過幾日就過年,北水截流前夕,港股反彈乏力,主板成交縮減38%至1,349億元。恒指上周接連失守多條防線,中期走勢偏淡,但我傾向相信係牛市調整而非步入熊市。
市場普遍以高位回調20%、跌穿牛熊線(250天線)、出現死亡交叉(50天線下破250天線)等指標判別熊市;亦有用數浪方法,但較複雜。若睇回調幅度,以恒指1月29日高位33484計,現時回調4,025點,要回調6,697點先算熊市;睇線更加無跌穿牛熊線、無出現死亡交叉。
就算睇埋市寬比率(50天線高於250天線嘅股份佔整體股份比例),亦未見熊。按歷史數據,該比率跌至40%先見熊,現時處於50%水平;而且喺熊市前,該比率往往超過70%,但2016年至今都未見過。不過,股市正在深度調整,後市波動難免,暫宜輕倉操作,無貨就睇定啲先。
美國文學家Ralph Emerson講過,只有喺天空最黑暗時,人先睇到星晨。喺上周大跌市時,股民就睇到咩股票夠硬淨,回購股是也!不過,上周回購涉資較大嘅有領展(823)同復星(656),前者四日共用2.75億元回購,後者兩日共用1.29億元回購。回購最頻密嘅係信星(1170),該股1月25日至今已11度回購,共用559萬元。上述三股本周連隨反彈,領展彈1.4%,復星彈3.2%,信星彈1.9%。北水上周百億掃貨嘅匯控(005),將於下周二派成績表,亦有回購憧憬。
信星係「股壇長毛」David Webb嘅愛股,持股6.01%。David Webb向來鍾情業務穩定嘅高息股,買入後長期strong hold。信星舊年11月尾宣佈半年多賺2.9倍,派中期息3.8仙、特別息11.2仙。信星派息後,淨現金仍有8億元,大約每股1元,有實力持續回購同慷慨派息。喺息口趨升之際,不妨留意下。

割柑人
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載