› 選擇地區
三藩市
紐約
洛杉磯
其他美國地區
香港 台灣 北美
 
2018年02月14日

中環在線:合和太子爺又升職 預備接班? - 李華華

胡應湘乖仔胡文新(右)噚日再升級做執行副主席。資料圖片

香港大孖沙第二、三代逐漸接班,最新有合和實業(054)主席胡應湘乖仔胡文新(Thomas),原本只係董事總經理兼執行董事,噚日再升級做執行副主席,唔通佢爸爸就快退休?

「執行副主席」呢個銜頭有啲熟口熟面,原因係新世界發展(017)主席鄭家純乖仔鄭志剛(Adrian)喺2015年時,亦獲擢升同樣銜頭。信和系黃志祥大仔黃永光亦喺舊年升咗做副主席,不過冇「執行」兩個字。

噚日合和業績電話會議上,Thomas當然被問到新職位是咪為咗鋪路做主席喇,佢竟然話唔評論;至於有冇無話睇多邊瓣,佢就話一如既往投入工作,仲會發掘新項目,加強團隊合作等等,繼續努力之類。

Thomas 1994年喺美國名校普林斯頓大學畢業,獲得機械及航天工程科學高級榮譽學士學位,之後喺日本三菱電機出任工程師3年,再去史丹福大學讀書,1999年獲得工商管理碩士學位。

Thomas早於1999年接手家族企業,起初出任執行委員會經理,翌年升為總監,負責評估公司運作同表現,2001年出任執董,2003年出任董事副總經理,2007年出任聯席董事總經理,2009年再調任為董事總經理,真係步步高陞。

李華華

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載