› 選擇地區
三藩市
紐約
洛杉磯
其他美國地區
香港 台灣 北美
 
2018年03月02日

中環在線:開戶唔使排隊 - 李華華

信銀國際推出inMotion動感銀行程式,用手機就可以遙距開戶。互聯網圖片

原來今時今日開銀行戶口,真係唔使再去分行排隊!信銀國際成功搶到頭啖湯,用手機下載inMotion動感銀行程式,畀電話及電郵,再用手機掃瞄身份證、自拍影張相、填埋簡單個人資料,就可以非面對面的情況下遙距開戶。

你可能會擔心,點樣辨別出係開戶本人又或者資料會否外洩等保安問題,查實信銀早前就已經試推個apps,用上創新技術例如人工智能、光學字符識別、臉部識別、活體檢測,仲有全方位測試,不過最重要都係過到金管局個「沙盒」。

信銀就形容今次係「踏出虛擬銀行第一步」,皆因開到戶口先可以做到其他銀行服務,現階段雖然只提供定存、兌換外幣、滙入滙出款項等簡單銀行服務,但之後希望逐步加入財富管理、信貸等服務,至於係咪有意第日申請虛擬銀行牌照,管理層笑住話「會積極研究係咪需要」。

講到最有趣,華華就覺得係信銀用太空人去包裝,話有咗遙距開戶,太空人都唔使憂開唔到戶口,仲可以好似太空人咁實現「無重狀態」,點解?因為你只係會收到電子賬單囉。

李華華

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載