› 選擇地區
三藩市
紐約
洛杉磯
其他美國地區
香港 台灣 北美
 
2018年03月05日

經濟客艙:
壞消息當好消息 - Captain Cool

特朗普去年初至今,於Twitter提及美股創紀錄新高嘅貼文超過60篇。 資料圖片

不論屬於好消息或壞消息,賺到錢就係有用嘅消息。而最壞嘅消息,就係投資者從來冇分辨,咩係好消息或咩係壞消息,白交學費。

美國總統特朗普較歷任總統更關心股市動向,活躍於社交網站Twitter貼文發放美股即市評論。不過,總統先生通常報喜不報憂,美股今年初接二連三破頂,美國有線新聞網絡統計,特朗普去年初至今,於Twitter提及美股創紀錄新高嘅貼文超過60篇。

美國股市創紀錄新高,特朗普也坦然承認為自己功勞,不停向投資者追捧股市好,美國經濟也向好。股市走勢某程度預視經濟走向,市場先生梗係唔認數。標普500指數成份股中,超過半數公司收入來源海外市場,盈利表現反映公司賺錢能力強,未必全面反映美國經濟有幾好。

美國揚言開徵鋼鋁重關稅後,方案十劃未有一撇,影響歐美股市急跌,多國領導人爭相回應或採取報復行動,霎時市場貿易戰煙硝四起。環球股市捱沽,反映投資者點只擔心打貿易戰,大家最怕美國通脹急升,聯儲局又繼續加息,一旦美國經濟過熱,後果冇人想像得到。

大部份投資者記得特朗普係美國總統,好少人記得特朗普係一位屢敗展戰嘅商人。特朗普有機會拋磚引玉式,牽引各方對美國優先政策反應,對美國會否落實對進口鋼開徵25%關稅、鋁則開徵10%關稅,留有談判空間。

不過,特朗普咁重視美股表現,認為「股市好即經濟好」前題下,總統先生不想背負經濟衰退或冧市推手罪名,開徵重關稅定案未到最後一刻,都有機會出現變數。真係畀你估得到,都唔會叫特朗普。

FB page: http://fb.com/seeforcaptain/

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載