› 選擇地區
三藩市
紐約
洛杉磯
其他美國地區
香港 台灣 北美
 
2018年03月05日

笑到最後:說了便是的走勢 - 高明

港股最容易嘅一段已經過去,今年繼續唔估趨勢,有趨勢出現,先當買保險咁買。 資料圖片

高明過年前所講,今年要展開較有意義的升幅,必須要達至冇合理懷疑,客觀上要做到就係跌到死心。農曆年前一轉的確係跌到太殘,短線有反彈機會,高明當期時去咗放假,冇把握到。
現時股市嘅「定價權」,仍然係喺美帝手上,聯儲局主席一句說話,或者美國總統一個決定,基本上已令所謂反彈推翻晒,令高明此等彈出彈入之徒難以操作,容易左一巴右一巴,可幸冇造淡,只係不斷中左一巴。
反而中國「去槓桿」較令人憂慮,憂慮嘅唔係「去槓桿」本身,而係好多市場中人戴上歐美先進文明嘅有色眼鏡看待中國「去槓桿」,如果現價只係反映市場中人用歐美規則嘅角度去定價「去槓桿」影響,就會令高明有啲擔心。
近期美帝加息、關稅嘅消息拖累全球股市,雖然會有陸續有來嘅憂慮,但政策推出,例如加0.25厘,或者抽鋼鋁關稅25%及10%,都叫明文規定。所謂西方的一套不能照搬中國,中式政策落實要靠揣摩,落實時寧可做多,不能做少,國情需要必然會盡做,同時落多項政策,例如A股不能淨沽出,結果唯一可以沽嘅就係港股。
上星期港股高低位跌1,345點,其實星期一已經有玄機露出,就係騰訊(700)喺開市競價盤時段一度大跌20蚊至432蚊,之後開市當冇事炒返上去,但巧合嘅係,之後星期三真係到價,並且星期四跌突至428蚊。證明知內情嘅人一早想不問價沽,只係唔知內情嘅人買盤太強,令到有人可以以更高價撤出。
港股最容易嘅一段已經過去,中美說了便是取代慢牛,中國國情盡做係雙刃劍,一旦有官媒傳出「去槓桿已經唔存在」,甚至鼓勵金融機構「理性務實適度再槓桿」,相信可以再創另一個牛三。但喺呢件事發生之前,今年繼續唔估趨勢,有趨勢出現,先當買保險咁買,左邊臉已被摑到腫晒,唔爭在被打多幾巴。

高明
http://fb.com/bigricetea
本欄逢周一刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載