› 選擇地區
三藩市
紐約
洛杉磯
其他美國地區
香港 台灣 北美
 
2018年03月07日

收市閒情:大陸樓盤名夠創意 - 千頌C

天津嘅「企鵝先生的別墅」,破咗企鵝只係喺南極嘅常識。互聯網圖片

有政協話為咗令民心歸附,首先要減少殖民符號,仲話要由地名同路名開始。於是個個都喺度諗「習大大道中」、「維尼大道東」,呢啲名係霸氣,係出色嘅,但如果你試吓Google Map吓大陸啲地名樓盤名,你就知,你可能低估大陸人改名嘅尺度。呢度輕輕歸納出中國六大改名玩法:
1)世界之窗式玩法:你試吓Google Map「白金漢宮」,你會見到除咗英國有個真白金漢宮外,喺深圳都有!如果你係曼聯Fans,冇時間去英國朝聖唔緊要呀!深圳有個叫「慢城」,英文叫「Slow Town」。
2)船堅炮利式玩法:想地址霸氣到嚇死人咩?航空母艦夠嚇未!長沙有個「航空母艦小區」。「司機,唔該我想去航空母艦!」司機唔趕你落車當你贏。烏魯木齊就有個「一炮成功小區」,呢度嘅住客,如果喺一個唔適當嘅場合,有異性問起,而你又答,嗯……希望對方唔好誤會。
3)肚餓式玩法:甜品唔一定係食,仲可以住!喺大興有個樓盤叫「金科果凍」;瀋陽有個「巧克力城」;廣洲有個盤叫「奶茶咖啡」,Sorry,可以走甜嗎?
4)夢幻式玩法:童話故事係浪漫嘅,但浪漫到好似上海有個小區叫「白雪公主」,咁請問入面嘅保安係咪要扮小矮人定惡毒母后,會全天候供應毒果嗎?行過少少去睇睇天津,就破咗企鵝只係喺南極嘅常識,當地有個盤叫「企鵝先生的別墅」,企鵝都住別墅,香港人呢?劏房咋!
5)思考人生式玩法:正所謂色即是空、空即是色。揚州就有個盤大玩活佛Viva,成個樓盤項目叫「阿彌陀佛家園」,返到屋企,唸住大悲咒、敲吓木魚,真係寫意呢;至於信耶穌嘅,自己行開啦。唔信佛教,信道教嘅都幫到你,西安有個「三豐中心思想小區」,入得去,都應該係武當派嘅弟子(應該係……)
6)晒冷式改名:講到最晒冷,以下呢個暫時係我搵到最直接嘅樓盤名,一個喺蘇州嘅盤叫「萬科碧桂園」,開發商冇錯,正正就係萬科(2202)同碧桂園(2007)!「你住邊呀?」「我住萬科碧桂園」。

千頌C
http://fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載