› 選擇地區
三藩市
紐約
洛杉磯
其他美國地區
香港 台灣 北美
 
2018年03月08日

冰說聰明:體現「同股不同權」 - 青冰

同股不同權股份的頭炮,如無意外是平安好醫生。互聯網圖片

過去一星期最多人談及的,必然是侵侵的貿易戰,昨天傳來白宮經濟顧問科恩辭職的消息,道指期貨即隊幾百點,一個咁成熟的市場都變得神經質,所以唔好怪港股近期咁chok。
侵侵咁搶鏡,另一重要消息都被忽略了,講緊嘅係獨角獸回國上市,雖然這個只係傳聞,但換轉在旺市或較平穩的市況,相信係利好消息。現時國內傳媒稱獨角獸可獲優待,不用排長龍而可打尖,你睇富士康A股申請,只需23個工作天,已經去到中證監審批的agenda,果然特事特辦,對於之後可能上市的超大獨角獸,發出一個積極的訊號。
在中國人的社會,響頭炮係非常重要,所以預計富士康可以順利過關,上市後仲會有好表現㖭。咁港股又點呢?港交所會在4月完成修改上市規則,同股不同權股份就可以申請上市,市場預期頭炮就係小米,最快可以7至8月上市,但近日又傳佢地想A+H同時上市,唔知會唔會因要遷就A股,在上市時間上會有所調整。不過只要心水清,便知道獨角獸頭炮,其實是平安好醫生。
平保(2318)於1月底發出公告,建議分拆平安好醫生獨立上市,並已向港交所交表,在3月19日,便會進行特別股東大會,唔好誤會佢地要在EGM尋求股東授權才可上市,今次的議程係,投票決定是否僅向H股股東提供保證配額。
由於現行國內的法規限制,好醫生上市係無法向平保A股股東提供保證配額,港股通亦暫不可以申請新股,所以真係體現「同股不同權」喇,只有H股股東可以享受到,但你又唔好開心住,今次投票A及H股股東都有份,換言之A股股東可以否決預留股份畀H股股東,到時有冇着數,要睇阿爺發落。但無論結果如何,上市將不受影響,市場預計上市時間是5月,如無意外,響頭炮應是好醫生,到時大家識做啦。

青冰
http://fb.com/chingbing888
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載