› 選擇地區
三藩市
紐約
洛杉磯
其他美國地區
香港 台灣 北美
 
2018年03月08日

財經評論:搭港鐵最可恥的行為

打工仔日日花個幾兩個鐘頭搭港鐵,人人有畀錢,無人有優待,無奈總有人行為可恥,令人髮指。
柱男柱女:繁忙時間逼滿人,你仲要整個人挨住,甚至攬住條柱。想要表演鋼管舞,非但換不來掌聲,甚至很多人排隊兜巴星。
企近門口死都唔走:每逢轉車,總有一兩個未到佢落車,又企喺門口的人,諗住縮起個膊頭,夾埋雙手,畀人從兩邊出入。乜出咗車廂,唔可以入返㗎咩?
掂你一下如殺你全家:車廂內誰無壓力?有個阿爺湊住兩個幾歲大孫女,孫女隻腳唔小心撞到隔籬個四眼仔一下,即使架着黑色鏡框,框內殺氣完全爆發,怒睥阿伯。
該讓不讓的座:不少人心底藏着:「我返咗成日工,我都好累!」但阿公阿婆撐住拐杖,大肚婆鑼咁大個肚企喺你面前,架車chok一chok,佢出事嘅後果比你為大。最可恥嘅係,後生世仔掛住篤手遊,扮睇唔到都未夠,明明金睛火眼打緊機,一見長者孕婦企近竟然極速熄機扮瞓覺!要講多次:「可恥!」
關愛座成批鬥座:已經晚上十一時許,乘客零星,惟獨餘下關愛座位,捱足一日帶着疲倦身驅的阿叔走到關愛座坐下,對面那看似三四十歲的女士突然轉頭睥了阿叔一下。無長者孕婦小朋友,坐陣都唔畀?正義感是要適時發放的吧。
你搭港鐵可能見到更多睇唔過眼的行為,就像撐住拐杖的阿婆站着,而你坐着篤電話。身邊乘客唔出聲唔係詐唔知,而是短短車程好快過,但即使選擇沉默,其實心內一直鄙視你!
記者:陳家雄

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載