蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年03月18日
馬上成為壹會員

摸魚手札:毛記葵涌新股攻略 - 渾水

毛記葵涌上市在即,腦細林日曦成功靠創意拼出一片天。資料圖片

毛記葵涌終走向上市尾段的大直路,撞正誠哥同日公佈退休,一代大商人退場意味一個時代的終結。腦細林日曦facebook寫的那段「loser到走向成功上市」的感言,感染力大到多人轉載,我也不停重溫。睇住一個失敗者努力拼搏,好睇過一個成功商人高位引退。誠哥跟年輕人距離太遠,反而林日曦更能引起我輩共鳴。
要不是《蘋果》記者朋友無禮地問誠哥和周小姐的關係,只怕個記者會我悶到訓着,無禮是無禮,但記者問出娛樂效果來。個人也不直接認識腦細,只是網絡上會吹吓水相互PM留言,我口頭上答應過會幫他寫的新書,到現在一隻字都未寫,走數味極濃,誠信逼近破產。不過無緊要,香港今時今日無乜誠信的人會混得比較好,我只是向這班「偉人」致敬而已。
林日曦讀書不成,放棄中國市場靠自己創意打拼出一片天,局限下發揮到極致,做媒體的、做廣告的睇佢唔起,然後現在他一手掃掉這班迂腐老屁股的眼鏡。睇到世代鬥爭出現贏家,睇住老屁股酸葡萄敗走的狼狽相,我真係好爽,開始感到世代有點靠近他這一代人。
網絡上也跟KOL健吾、盤菜瑩子講起如何抽新股。利申一下,純粹當個案討論,唔好因為我提過就入飛抽新股然後入我數。事實上,首日公開發售已超購過千倍,毛記已順利集到應有的資金,很大機會問鼎今年超購倍數王。再入飛反而中籤率不高,借孖展抽反而蝕息。
抽新股硬技術不能掌握,心態才更重要。我見到有人會質疑毛記盈利倒退,仔細分析報表再決定落唔落飛。多鬼餘,𠵱家係抽新股啊,睇死大家咪又係第一日見高開就搵位沽貨。換言之,這不是投資,而是博彩性質的抽獎遊戲,你睇基本因素、財務報表托咩,咪又係搵吹毛求疵的小錯,然後借勢攻擊毛記廢之類。唔好呃自己,幾多人會做長情股東,大家都係想玩新股賭供求的博奕遊戲。
就算是偏近毛記的意識形態或政治立場,都不一定代表金錢上支持毛記股票的炒作。舉個例,希望肥佬黎黎老闆唔好介意我大言不慚,查實香港夠近一半人支持壹傳媒的意識形態和政治立場,咁又有幾多真係壹傳媒的股東先,對不?誠實面對自己內心,誠實面對自己荷包,你入飛抽毛記,都係想贏錢居多。
我支持毛記,但客觀講今次資本遊戲的值博率不高,毛記已超購千倍,抽中股份機會不高。我支持毛記,方式有很多,例如執筆寫書、買林日曦著作,然後等4月睇我偶像東方昇表演特異功能都得。

渾水
專業投資者、上市公司執行董事、90後
http://fb.com/muddydirtywater

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載