› 選擇地區
三藩市
紐約
洛杉磯
其他美國地區
香港 台灣 北美
 
2018年03月20日

操盤手札記:盈利復蘇績優股 - 割柑人

太古上周放榜,舊年多賺1.7倍。圖為主席史樂山。資料圖片

繼習近平連任中國國家主席後,普京亦連任俄羅斯總統,一早預咗。事實上,政治興替對市場嚟講只係噪音,最緊要係睇對經濟有乜影響。講到影響經濟,莫過於美國總統特朗普開打貿易戰!佢支槍正瞄準中國,據講將於一、兩周內推出一系列針對中國嘅措施。
特朗普政府又擺姿態,退出長達十年嘅美中官方經濟對話。照牌面睇,特朗普對中國越嚟越唔客氣;不過,佢對習近平就仍然扮friend。生意人講利益,喺經貿上嗌霎,只係逼對方讓步嘅過程;而且11月國會選舉,特朗普需要選票,照計唔會搞禍件事,影響實質經濟。
美股上周五繼續造好,港股本周未能承接升勢,但已連續八日先低後高,出現小陽燭,低位似有資金收貨,醞釀向上突破。恒指收31513,升11點或0.04%,估計美國聯儲局周四凌晨公佈議息結果前後,有機會出現突破。
本周有多隻大藍籌放榜,周二有平保(2318)、周三有騰訊(700),都係市場焦點。呢兩隻強勢股,不妨吼位吸納,皆因指數若要突破,呢啲強勢股始終要擔大旗!不過,貿易戰當前,市況趨波動,入市要控制注碼,宜採「轉弱減磅,破位加注」策略。
上周放榜嘅藍籌,不乏績優股,例如太古A(019)。太古係綜合企業,業務分為五瓣,包括航空、地產、海洋服務、飲料、貿易及實業,舊年多賺1.7倍,撇除投資物業估值變動則多賺55%。太古持有45%國泰(293),雖然國泰舊年虧損擴至12.59億元,但以上半年蝕20.51億元計,下半年已轉賺7.92億元,今年有望對太古恢復盈利貢獻。
舊年業績好醜唔係重點,今年前景點睇先係關鍵。太古放榜後,大行紛紛睇好盈利復蘇兼調高目標價,高盛睇93.5元,花旗睇95元,里昂更牛睇99元。該股放榜前已突破密集阻力區80元水平,放榜翌日高見82.55元破頂,現價82.2元,呈現頭肩底、區域突破利好訊號。

割柑人
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載