› 選擇地區
三藩市
紐約
洛杉磯
其他美國地區
香港 台灣 北美
 
2018年03月21日

收市閒情:「毛記分析員」熱潮 - 千頌C

毛記IPO熱搶,更掀起一場「分析員」熱潮。圖為毛記創辦人之一徐家豪(林日曦)。資料圖片

毛記(1716)IPO熱搶,早兩日有證券行經紀講,「嗰日有個20歲嘅後生仔,話想開孖展戶口抽100毛。然後問,孖展其實係點玩法?」係好事嘅,多啲人參與港股,個市旺啲,港交所(388)都升得快啲啦。不過,新股熱以外,「抽,定唔抽」變成網絡上居家旅行,抽水必備良藥,更掀起一場「分析員」熱潮!

1:招股書一出,唔同行業嘅fb Page、KOL係咁出Post,逐字逐句鑽研佢盤數,幫你分析拆局睇基本因素,話你知毛記抵抽唔抵抽!喂!唔係毛記,真係唔知原來咁多人都係分析員呢!雖然好多「網絡分析員」都睇錯數,喺討論抽同唔抽之前,已經抽錯水,但都好嘅,令多啲人接觸吓招股書,學習睇吓年報,對大家自身有益。

2:「嘩!毛記蝕咗咁多,真係你抽埋我嗰份」,一個二個網絡分析員,撻晒啲基本因素出嚟,講到似層層咁。不過分析師們,其實一隻新股抵唔抵抽,主要係講供求,毛記公眾持股25%。當屯門公屋單位都賣緊800萬時,毛記公開發售集資額都係得810萬,集資額咁細,做到萬人空巷抽條毛係理所當然的事。話知你將盤數拆骨,根本同抽唔抽得過呢個問題,係可以完全!完全!完全冇關係呢。

3:網絡分析師好可愛,聽過最嘆為觀止嘅分析係:「呢間冇資產,如果集資後,第二日執笠呢,咁集資淨額5,280萬,啲老細就可以分走4,000幾萬走佬,至於股東就分1,300萬。」聽到呢句,真係忍唔住要講句,「做咩啫你!」
即係咁,好多公司都係冇咩資產,港交所(388),無形資產佔固定資產值九成!講隻天仁茗茶賓仕(1705),資產值同毛記一樣,都係1,800萬左右,咁天仁茗茶兩日炒高幾多?炒高招股價7倍呀!第二,如果真係執笠清盤着草走佬,股東想分錢,下世啦!以2014年初上市嘅福建諾奇(1353)為例,掛牌半年,主席兩公婆就挾帶潛逃,之後一路停牌至今,散戶嚿錢鎖足三年幾!根本成段分析都唔Vaild,但最正嘅係,好多人留意讚好,話「咁我唔抽啦。」

長篇大論,唔係想唱好毛記,反正就算抽到我都會好快走,冇興趣長揸;最想講係,喺人人KOL年代,唔係人人都會「先求知,再教人投資」,各位炒股新手網上搵投資意見時,請小心選擇,多睇新聞,以免中伏。

千頌C

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載