› 選擇地區
三藩市
紐約
洛杉磯
其他美國地區
香港 台灣 北美
 
2018年03月22日

七級偽術:一夜和諧三萬蚊 - 彭瑪莉

林鄭(右)繼隨手俾500蚊行乞婦人後,又一次觸發踩鋼線公關。資料圖片

民主黨黨慶,特首率領眾司局長出席,本來真是不錯的姿態。正常情況下,你話政府伸出橄欖枝又得,你鍾意hashtag「大和解」亦無不可,但衰就衰在呢位特首重蹈當日選舉期間隨手俾500蚊行乞婦人的覆轍,失驚無神舉手捐三萬蚊贊助李華明唱歌,咦,私人贊助民主黨,咁即係點?

有人覺得葉劉小器,但我覺得佢講得啱喎,林鄭的確舉手間就開了個「危險先例」,咁唔通你係真心鍾意聽李華明唱歌,而且喜歡的程度,足以叫你豪花三萬大元買個開心?咁李先生莫非是夜總會歌女,你林鄭是恩客乎?

抑或像葉劉說的,林鄭私下掏腰包向民主黨「買票」,但求該黨高抬貴手,在議會內多多識做?倘如是,我係政黨就唔客氣了,一於個個向林鄭攤大手板,看你那份特首俸祿,夠不夠你還人情債。

問題是這樣做不止令其他政黨眼紅,對林鄭不利,其實對民主黨亦非好事。嗱,一街都知特首私人醒你三萬元,仲俾林鄭在社交媒體抽水,咁你下次對政府立場稍為溫和,會不會瓜田李下,被人懷疑留手皆因收了利益?

葉劉直性子,特別敢言,不惜公開批評,絕對有理由相信,建制一方,好多人敢怒不敢言。事件未必燒得起,但特首這種踩鋼線公關,真的看得人目定口呆,不是不許破格,但一件事如果以前一直冇人做,也許是真的不宜做,不因前人比你蠢。

彭瑪莉

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載