› 選擇地區
三藩市
紐約
洛杉磯
其他美國地區
香港 台灣 北美
 
2018年03月22日

中環在線:蘇澤光篤爆 港交所史美倫揸fit - 李華華

港交所(388)主席周松崗做多一個月就退任,市傳金發局主席史美倫係大熱,咁啱瑞信噚日朝早舉行投資者論壇,瑞信大中華區高級顧問蘇澤光(又即係機管局主席)認真鬼馬,佢做主持喺台上介紹講者史美倫時,除咗話佢係現任金發局主席之外,最後突然補一句:「我哋都知道佢將任下屆港交所主席。」

史拒回應

史美倫講完speech,就邊行邊話唔回應提問,趕住要去下一場開會咁話。咁究竟蘇澤光係咪一時未食早餐,定係真心爆料,就真係唔知喇。
雖然盛傳史美倫係港交所下任主席,但程序上都要走一轉嘅,港交所4月舉行股東會後,董事會互選產生一位主席,最後由特首林鄭委任,史美倫作為林鄭財金三大靠山之一,似乎都冇乜阻滯。
而史美倫喺金發局嘅主席任期下年1月屆滿,如果4月獲選為港交所主席,就有大概9個月嘅重叠期。
史美倫監管背景一啲都唔弱,前後喺證監會同中證監一共工作十幾年,上任後應該可以促進港交所同證監會之間合作無間啩。
人在其位,史美倫亦有例牌講講金發局未來發展方向,例如研究監管上有乜值得放寬同改善,點樣發展香港私募投資等等。不過晨早俾蘇澤光咁樣講一講,大家將焦點放晒去主席之位喇。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載