› 選擇地區
三藩市
紐約
洛杉磯
其他美國地區
香港 台灣 北美
 
2018年03月22日

冰說聰明:BB都睇世界盃? - 青冰

雅士利自2013年被蒙牛收購後,業績越來越差,

今年六月有大事發生,全球注目,你梗係以為青冰說A股加進MSCI了,今次唔係,今次講嘅係4年一度的世界盃。無論你是否球迷,世界盃都總會有一種魔力,令到你會睇吓波,認識一下陌生的國家名及靚仔球星,早幾日睇通告更加大開眼界,原來BB都可能會參與這個盛事。
雅士利(1230)上星期五公佈,佢哋向蒙牛(2319)的附屬公司購入1,628張俄羅斯世界盃的門票,合共約400萬港元,由於蒙牛係雅士利的控股公司,所以有關交易係屬於關連交易,即使銀碼咁細,都需要出公告。按通告話,這些波飛將支持集團的營銷活動。雅士利主要產品係嬰幼兒奶粉,咁客戶應該係BB啦,負責揀奶粉應該係媽咪啩,屆時各位爸爸會唔會為咗飛去俄羅斯睇,力勸老婆買呢個品牌的奶粉呢?最後啲飛去咗邊,自己諗。佢哋自2013年被蒙牛收購後,業績越來越差,2016年度蝕3.2億人仔,2017年上半年都蝕1.2億,作為股東,見到公司越來越差,仲要見到你拎幾百萬去睇波,心情自然更差。
講開世界盃,即使你唔睇波,都要理解吓到時六月個股市會淡靜啲,作為亞洲球迷要捱眼瞓睇,歐洲球迷雖然沒有時差,但由於大會想遷就吓亞洲,有些賽事都安排在歐洲中午時間進行,即係話開緊市有波睇,歐洲交易員好可能trade少啲啊。至於概念股,青冰即時諗到啤酒,在港上市的華潤啤酒(291)及青島(168)都算係受惠股,蒙牛作為世界盃的贊助商,亦可借此機會向世界推廣自家品牌,不過點樣向飲住啤酒或伏特加(俄羅斯嘛)的球迷去sell自己呢,真係考功夫。體育用品股好似相關,但在香港上市那幾間,主打都係籃球及跑步,如果夾硬要揀,青冰都係首選龍頭安踏(2020)吧。

青冰
http://fb.com/chingbing888
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載