› 選擇地區
三藩市
紐約
洛杉磯
其他美國地區
香港 台灣 北美
 
2018年03月28日

財女手筆:填海不填海 - Melody

香港土地從來都係短缺,填海可以增加土地供應。資料圖片

近日特首高調批評環保團體反對填海,引起公眾再次熱烈討論究竟香港應否繼續填海建屋,以增加供應,壓抑樓價。

其實,呢個問題要討論根本係多餘。香港由開埠到𠵱家百幾年,好大部份𠵱家我哋用緊嘅地方根本係填海得番嚟。成個港島北嘅商業區、新界嘅新市鎮包括沙田,大埔,將軍澳到東浦、機場等等,隨口講都一大堆,地全部都係填海拎番嚟。如果,香港唔填海,根本無可能發展到今時今日住到700萬人。

如果有人今日先嚟反對填海,其實非常無知。香港土地從來都係短缺,當年港英政府因為人口越來越多,決定喺新界開發新市鎮,不過無地,於是將成條城門河兩岸填平,甚至𠵱家樓價已升到上天嘅馬鞍山,亦係填海得番黎。幾十年後嘅今日香港一樣面對唔夠地起樓嘅困境,繼續填海甚至加大填海規模先至係應該要做嘅野。當然填海地點可以討論,不過妄想唔填海,又可以增加供應,世界並無咁兩全其美嘅事發生。

香港嘅競爭對手新加坡,全國兩成幾嘅地方係填海得到。佢哋嘅政策好簡單,唔夠地就去填,人口增長快,填海拎地嘅速度就要更快,填海填到附近國家連填海用嘅沙石都唔肯賣畀佢。相反,香港仲喺度討論應唔應該填海。人口不斷增長,可建屋嘅土地遠遠追唔上需求。

上咗車買咗樓嘅就大大聲反對,唔好喺我果區填海,填完無咗個海景邊個負責?環保人士又反對,怕填海影響生態。政府又弱勢無辦法營造共識,咁你話樓價點可以唔高?

Melody
Fb.com/whichroad

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載