› 選擇地區
三藩市
紐約
洛杉磯
其他美國地區
香港 台灣 北美
 
2018年04月03日

操盤手札記:市場最buy內需股 - 割柑人

蒙牛上周放榜,扭虧為盈,大行紛紛唱好兼調高目標價。 資料圖片

稅改嚟喇!講緊嘅唔係美國,而係中國。復活節假期前夕,港股chok到暈,一度跌穿長期上升軌及前浪底,之後傳出國務院常務會議決定深化增值稅改革,5月起製造業稅率由17%降至16%,運輸、建築、電訊業及農產品稅率由11%降至10%。受減稅刺激,中港股市隨即反彈。
港股放假期間,A股上落唔大。美股放假前,亦喺科技股回升下反彈超過1%。不過,後市變數仍多。中美正就貿易戰過招,美方即將公佈關稅清單。據講大部份屬高科技產品,相關股份隨時拖低大市。事實上,恒指無論周線、月線、季線圖,都現「射擊之星」向淡形態。
業績期煞科,舊年嘅「牛市三寶」——騰訊(700)、平保(2318)、港交所(388),雖然業績交到貨,但股價不升反跌。衰咩?騰訊衰在大股東、總裁相繼掟貨;平保衰在未知幾時分拆陸金所;港交所衰在內地以CDR形式搶生意。強勢股失勢,現時市場最buy咩股呢?
貿易戰當前,內需股如日用品、食品、房地產、銀行、保險、醫療等,成為入貨對象。另一方面,人民幣急升,一度高見1美元兌6.2361,創2015年8月11日匯改以嚟新高,隱然有1985年「廣場協議」嘅況味。人民幣升值,亦令派發人民幣股息嘅股份更有睇頭。
話時話,平保都係內需股,又係人民幣升值受惠股,現價79.8元,市盈率12.6倍,作為藍籌績優股,已值得分注吸納。不過,要留意嘅係,平保放榜至今,連續8個交易日錄得以billion計嘅沽空,總額近168億元,沽空金額一度佔成交金額四成,大鱷出沒注意!
藍籌之中,內需股蒙牛(2319)上周放榜,扭虧為盈,賺20.5億元人民幣,派末期息0.12元人民幣。大摩、摩通、花旗、德銀、瑞信等大行,紛紛唱好兼調高目標價。該股上周四大成交抽升7%,收26.9元,挑戰短期下降軌,若向上突破,不妨短炒番轉,上望30至32元。

割柑人
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載