› 選擇地區
三藩市
紐約
洛杉磯
其他美國地區
香港 台灣 北美
 
2018年04月04日

財女手筆:國指其實唔使咁悲觀 - Melody

北方資金繼續源源不斷流入港股掃貨,大漲小回格局不會變。資料圖片

第一季剛過去,股市如坐過山車,高低波幅驚人,埋單計,曾經到口嘅肥肉又跌番出嚟,甚至乎嘔突。
展望嚟緊3季,好多人睇法偏淡,甚至覺得好快又股災。的確,無論近期恒指同國指走勢極差,市場氣氛亦偏向悲觀,睇淡大市都無可厚非。不過退一步,抽離呢啲短線因素,睇宏觀大勢,今年香港股市、尤其係國企指數其實唔應該咁悲觀。
首先,近來困擾市場嘅中美貿易戰,其實長線去睇根本對中國市場影響微不足道。中美互相靠嚇,目的只為係談判桌上增加自己嘅籌碼。世界經濟行到今時今日,已經去到你中有我,我中有你密不可分嘅階段,兩方面其實都打唔起呢場貿易戰。
特朗普係生意人,對自己無利益嘅野一定唔做,習近平要搞經濟穩住政權,亦輸唔起呢場貿易戰,雙方最後點都會坐低慢慢傾,依家市場只係放大咗易戰嘅影響。
其次,即使上年升咗咁多,以估值計,香港股市仍然係全世界估值最便宜嘅市場之一。尤其係國企指數,市盈率大概係10倍左右,預測市盈率更低至8倍。2017年大部份國指成份股公司已經出咗業績,發盈喜者比比皆是。
展望2018年,大陸繼續供給側改革,加上佔比大嘅內銀恢復增長,以現價預測市盈率8倍,完全係低估得緊要。除非大陸經濟今年下半年突然崩潰或者世界出現特大金融災難事件,否則要喺現價出現股災,可能性真的不大。
最後,北方資金繼續源源不斷流入港股掃貨,除非呢批資金沽貨走人,否則係北水爭奪港股話語權下,大漲小回格局不會變。
國企指數過去10年都跑輸大市,現價12000點其實仲係過去10年波動橫行區間,已經唔講2007年港股直通車嘅歷史高位20000點,連2015年大時代15000點都望到車尾燈。喺大部份國企盈利能力不斷轉好而且恢復正增長之下,向下股災定向上追落後,機會邊個高啲,大概都估到。

Melody
http://fb.com/whichroad

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載