› 選擇地區
三藩市
紐約
洛杉磯
其他美國地區
香港 台灣 北美
 
2018年04月06日

中環在線:
滙豐一姐返工look撐七欖 - 李華華

施穎茵同王冬勝齊齊以返工look出席活動推廣欖球。

一年一度Hong Kong Sevens開鑼,贊助商滙豐噚日率先舉行社區同樂日推廣欖球比賽,香港區行政總裁施穎茵(Diana Cesar)當然要出席支持,同場仲有滙豐副主席王冬勝、政務司司長張建宗,同埋啱啱上任嘅東華三院主席王賢誌,當大家以為佢哋會上場表演,咦,個個都business attire,返工咁款喎,難道出席活動後要趕去開會?
冇欖球玩唔緊要,Diana就代表滙豐送個本地藝術家辛朝殷手繪嘅欖球紀念品畀張建宗。身形嬌滴滴嘅Diana好誠實咁話,自己冇玩開欖球。不過喺滙豐耐咗,對欖球認識深啲,就發現欖球都唔係想像中咁physical,仲好講究團隊精神。佢話自己雖然冇玩,但單單睇吓學吓都覺得可以應用落企業團隊度,獲益良多咁話。

拒透露心水隊伍

Diana透露,過兩日一定會到場睇7人欖球賽,但就唔肯講自己支持邊隊,笑笑口話滙豐裏面好多同事支持唔同隊伍,都啱嘅,老闆心水隊伍呢啲嘢,話唔定係機密呢,費事分化大家喇。
雖然噚日天氣頗熱,幾位都落咗攤位影吓相,全場最sporty嘅應該係擔任大使嘅女飛魚歐鎧淳,仲跟小學生一齊參加欖球體驗訓練班㖭呀。

李華華

mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載