› 選擇地區
三藩市
紐約
洛杉磯
其他美國地區
香港 台灣 北美
 
2018年04月25日

收市閒情:中興「柒事大全」 - 千頌C

中興被美國制裁,切斷供應鏈,成件事令中興高層嘅智商露晒底。資料圖片

中興(763)被美國制裁,切斷供應鏈,呢一切,唔止令中興露晒底;更重要係,令中興高層嘅智商露晒底!天啊!只要睇晒成件事來龍去脈,根本係一套笨賊喜劇!

話說成件事,中興目的只有一個,就係要賺伊朗錢!呢頭同美帝簽禁運協議,轉個頭就靜靜雞同伊朗做生意!即係咁,你違約都算,都唔好咁豬呀大佬!

豬事一:
中興暗啞底同伊朗做生意,搵咗個法律顧問Ashley Kyle Yablon,全權負責打甩美國嘅調查;天下律師多的是,好搵唔搵,搵着個同伊朗有血海深仇嘅猶太人律師!大佬呀,你會唔會請一個醫生,去醫佢嘅殺父仇人?睇新聞讀吓歷史OK?結果點呢,結果Yablon不但止唔幫中興偽造文件,劈炮之後就走去同FBI放料!

豬事二:
好啦,到後來中興啲高層發現個律師唔對路,就叫Yablon自己刪除所有相關文件,當時係2012年4月26日。喂呀!你有日發現屋企有賊,同佢講,「你自己放返偷咗嘅嘢去原位啦。」然後走咗去。話晒都係科技公司呀,你唔想一個員工接觸啲文件,直接鎖晒佢嘅權限,連機都沒收埋就最乾手淨腳!

果然,去到5月7月,足足兩個星期後,Yablon仲可以將全部Save晒犯罪紀錄嘅電腦交畀FBI!

豬事三:
話晒你都係做緊犯罪行為,唔見得光耶!但中興好霸氣架,根據喺網上廣傳嘅兩份「機密內部文件」,白紙黑字寫晒同伊朗交易策略,鉅細無遺講公司點避開監管。文件開頭都用暗號「YL」去代表伊朗嘅,去到後尾已直接寫「公司在伊朗、蘇丹、朝鮮、敘利亞及古巴五大禁運國均有在執行的項目」,慌死有犯罪資料寫漏咁。

最好笑係,連罪行被人發現後嘅後果,中興都分析清楚!一間中國第二大通訊設備國企,為食大茶飯,竟然將自己犯罪動機、策劃、同黨、後果整個懶人包出來,真係方便過捉奸在床!

豬事四:
最好笑係,正常罪證文件,都冇人肯認頭,但呢間公司啲高層,排住隊爭住喺份文件簽名,雞乸咁大隻字寫住「總裁批准:同意」。情況有如同人夾份買兇殺人前,開個誓師大會一樣咁壯烈!更厲害嘅係,呢份「機密內部」罪證,中興員工係可以輕易喺公司Server Download呢!中興啊,你點計都係一間科技公司啊,係咁意都加個密啊。

豬事五:
講開加密,中興真係好出色,話晒伊朗壇生意係價值13億美金嘅大茶飯呀,你畀掩口費都畀啲誠意。不過中興只係同知情人事簽保密協議,如果洩密嘅後果,只係賠償中興100萬元人民幣(15萬美元)。用100萬人仔保密協議去掩飾13億美元的違法行為,十個豬。

豬事六:
睇戲都有睇,「風頭火勢,避一避先好」。明明美國仲查緊中興,但中興唔識死,繼續犯案。

明明美國畀晒機會,叫你炒、懲處參與向伊朗售賣禁運設備39名員工,咁就唔頒禁令,點知不單止唔炒,仲有bonus收,真係當人死㗎?

豬事七:
中興高層去美國,董事長秘書部電腦,竟然有晒向伊朗出口設備會議的全部會議記錄、高層決策等等全部資料,都被美國海關檢查時睇晒。呢單喺國資委報告爆出!報告仲話「中興系列應對十分愚蠢和被動」。

成件事豬到一個點,係真係一個有睇開警匪片嘅人,都唔會犯嘅低智錯誤。最灰嘅係華為,中興文件好衰唔衰寫晒華為嘅手法,話要「大家!我哋要學晒對家嘅精粹!」結果,美帝就拎住呢份嘢質華為;依家仲搞到華為要退出美國市場!

「中華有為、中國興旺」,如果我係華為,死在豬隊友手上,都係心甘命抵,𠵱家死在「豬對手」手上,真係阿彌吉帝。

千頌C

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載