› 選擇地區
三藩市
紐約
洛杉磯
其他美國地區
香港 台灣 北美
 
2018年04月25日

財女手筆:美圖係咪垃圾股? - Melody

美圖會喺今年第二季將美圖秀秀轉為社交平台,以美圖4.5億用戶做基礎,未來廣告收入無可估量。資料圖片

美圖公司(1357)前年年尾上市,曾經有過一輪炒風,股價炒到上20蚊樓上,之後就一路沉底,到最近已經去番招股價附近。兩年前大家當美圖只是一隻大陸山寨app,炒完就散水;兩年後今日,股價反映投資者仍然當美圖係兩年前果種垃圾公司,不過事實係咪真係咁?

美圖剛剛出咗2017年業績,當大家只係留意美圖又蝕錢嘅時候,其實美圖份業績已經話咗畀大家聽,佢今時唔同往日,2018年會係佢騰飛嘅一年。

第一,2017年美圖總收入45億人仔,來自互聯網收入增長咗超過6倍,收入貢獻佔比由6%升到接近20%。之前啲人不斷批評美圖掛羊頭賣狗肉,掛住科網公司個名實質係賣電話,唔會長久;𠵱家佢話比你聽,坐擁超過4.5億用戶嘅美圖,一旦可以將用戶變現,互聯網收入可以好誇張(來自在線廣告嘅收入係2017年增長4倍),而且佢完全可以實現盈利。

第二,美圖於業績會表示,會喺今年第二季將美圖秀秀轉為社交平台。即係話,中國版Instagram好快面世。以美圖4.5億用戶做基礎,未來廣告收入無可估量。美圖商業化道路順利,2018年實現盈利似乎無咩難度。

現價美圖股價仲喺招股價附近,以一間年收入增長以倍數計算嘅互聯網公司,市值只係值400億已經係低估,美圖主席蔡文勝最近頻頻係股價低位增持美圖股份已經係明證。依家投資者仲係以有色眼鏡睇美圖,當佢垃圾老千公司;不過當今年如果美圖由蝕轉賺的話(美圖2017年第四季已經賺緊錢),現價接近招股價嘅美圖其實相當值博。

Melody
http://fb.com/whichroad

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載