› 選擇地區
三藩市
紐約
洛杉磯
其他美國地區
香港 台灣 北美
 
2018年04月30日

智取大市:煜榮底下無新事 - 晉佳

喺投資股票嘅世界,別人恐懼我貪婪係永遠嘅至理名言。 資料圖片

全購殼股炒貨源歸邊嘅一招,縱橫咗細價股壇多年。想當年2010年,中海外(688)全面收購蜆売電器再保留上市公司地位,及後變身成為中海宏洋(081),股價倍翻,打後全購殼股成為大戶極速收貨炒上嘅絕招,亦估唔到呢招能夠玩到今時今日2018年先玩到爛。
金利豐經手嘅煜榮(1536)賣盤交易,全購價1.79元成為唔少細價股投資者信以為真嘅鐵底價,結果完Deal後冇幾多日,就急升然後再急跌,一度跌至低全購價五成以上。事實證明,1.79元根本唔係乜嘢大戶平均價。究竟背後係一場乜嘢把戲唔再重要,更重要嘅係,以後唔能夠簡單睇一個G.O.價就斷言見到黃金入市機會。
喺股票市場上,一種特別嘅大戶收貨方式,可能係一種新財路,但當越嚟越多人注意呢種賺錢方法,最後都會成為投資者慘敗嘅方式。同樣,技術分析都可以係一種陷阱,由金融海嘯前嘅黃金比率,去到近年嘅RSI,只要成為股民主流分析方法,就係呢種方法步入墳墓嘅時候。
喺投資股票嘅世界,絕不存在一招可以玩一世嘅把戲,即使價值亦可被扭曲若干年,令你失去3年又3年,唯一永遠管用嘅事情,就係別人恐懼我貪婪呢種老土得嚟又永遠都唔老土嘅名言。

晉佳
http://fb.com/advanceguy1
本欄逢周一、三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載