› 選擇地區
三藩市
紐約
洛杉磯
其他美國地區
香港 台灣 北美
 
2018年05月03日

一路一帶:搵筍工難過有普選 - 斯郎

Apple Store初嚟香港時,劃一以3萬月薪搶人,見工排隊一度長達兩年。資料圖片

香港打工仔可謂全世界最勤力,工時長,人工中等,工作效率高,企業盈利異常地高,同一件產品喺外國只算「百佳」貨,但放在香港超市卻變成高級中產貨,賣貴3倍價錢。香港打工仔幫老闆賺錢能力奇高,但福利甚少,筆者最近有位高層朋友感嘆,其實未必要高人工,但只要工作環境夠好,福利合理,自然變成筍工,大把人爭住去做。

呢位朋友喺蘋果公司打工,佢透露最新大西北將會開新分店,入去蘋果公司做店員其實有咩咁好?街外人以為每逢出新iPhone,員工實有得炒,但朋友斬釘截鐵,肯肯定話冇得炒。咁人工呢?初初Apple Store嚟香港,不論經驗,劃一以3萬月薪搶人,部份人工可高至4萬元,所以遞交求職信嘅人排山倒海而至,見工排隊一度長達兩年,不過近月籌備開新舖,招聘進度加快,半年以內一定見工,但目前人工已回落至1.7萬至2萬水平。

咁Apple究竟有咩競爭力?首先你會熱愛Apple產品,其次係冇跑數壓力,因此唔使怕應付「西客」。重點喺福利極好,女士產假長達半年,男士侍產假亦有3個月,較法定3日高出近30倍,數萬元醫療福利包埋家人,健身津貼數千,旅行假期等等,返工返到腦閉塞,可以請1個月假,走一轉歐洲南美,學近日失業嘅前樂視主持馮堅成咁,玩轉天空之鏡,絕對冇問題。Apple坐擁數千億美元現金,今年首季賺138億美元,即係過千億港元,對員工當然唔使慳錢。

港資、中資及外資企業福利嚴重脫節,筆者記得,有位由電視轉戰網購嘅商人話,唔希望員工講work life balance,要全力以赴,但連售後服務熱線都冇,度縮數走精面,筆者幫襯過兩次後已敬而遠之。

筆者亦有很多商家朋友,小至公司30名員工,大至中港兩地數十間分店,每年都會請員工去旅行,假期花紅派到足,佢哋永遠都話,錢賺唔晒,打拼江山嘅手足最重要,「除咗手足有飽飯食,仲要有尊嚴地生活」,呢番充滿人性嘅說話,並唔係每個老闆都諗到,當最低工資加幾蚊,就嘈到拆天嘅廿蚊張,每日半個鐘飯鐘錢都要計到盡嘅奸商,香港呢個自由市場,其實真係處處商機。

後記:71歲清潔婆婆每周工作六日,每日8個鐘,月薪只得六千多,仲要被扣飯鐘錢,難怪政務司司長張建宗叫人唔好退休,因為打工仔唔搵多啲錢,點養班高官呀?

斯郎
https://fb.com/oneroadonebelt/

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載