蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年05月03日
馬上成為壹會員

Hea富生活:被買樓的生意人 - 郭釗

生意人買樓,只要有條靚仔的流水賬,向銀行借九成甚至借凸都問題不大。資料圖片

有天跟一個生意朋友飲茶講開樓市,他說近來睇緊樓,但是被銀行迫的。此話何解呢喂?
這個朋友近年生意越做越大,一年生意額十幾億。密謀上市不在話下,咁大條現金流,好多上市公司恨「做」都未必做到。因為條數大自然多財技玩,無數就神仙難變嘞。
但作為一間私人企業,有良好現金流,好處就是借貸方便。
普通打工仔,就算十幾廿萬一個月,買層一千萬以上的住宅物業最多借五成,工商舖車位最多四成,少則三成,又壓力測試又稅單,仲要有人頭,難度分是九分。就算你幾睇好樓市想買物業投資,都係一間起兩間止。
但做生意就唔同講法,只要有條靚仔的流水賬,銀行借九成畀你又何妨,若然關係好,借凸都仲得。
朋友已經是銀行的「老拍檔」,越借越大條數。而且向來有借有還做晒上等人,但想要再借,發現不是掛住「上等人」呢個牌頭就有交易。問清楚,原來差在冇買樓!
借貸部主管跟他說,所有生意人,生意好都會買樓,「你生意好唔買樓,咪唔夠說服力囉……」

鹹魚翻生靠物業

吓?!真金白銀單據往來兼交足稅,都不及「買樓」有說服力?當然啦,生意會有上落,今年做十億,下年得一億唔得呀?你睇吓100毛前年同上年條數……
到時call你loan,你破產即時渣都冇;樓就唔同喇,抵押給銀行,借給你那位同事又好交代。
冇首期?用貨款畀住先囉,條loan一批,兩、三個月連首期連帶借貸全數樓價畀番你。銀行經理話眼見幾多冇錢賺,而又有大量現金流的生意人,這十幾年都是靠買樓升值再借再升值,不斷重覆而鹹魚翻生。
另外有個在香港冇買樓的朋友話:「嘩,聽你咁講,香港現時樓市咪同九七一樣?一爆實好大鑊,好彩我冇樓箒!」
所以人通常係狀況決定腦袋。香港不同內地,香港人創業的意欲不高,十個人都未必有一個做生意,而且進取成咁,少之又少,影響輕微。加上辣招處處,普通打工仔買到層自住樓已經還神,並沒能力像做生意一樣過份借貸。
但若果樓市真正回調二、三十個巴仙,這班「被買樓」的高借貸比率生意人,將會是第一批被發現是沒着泳褲的泳客。

郭釗
http://fb.com/heaology.edu
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載