› 選擇地區
三藩市
紐約
洛杉磯
其他美國地區
香港 台灣 北美
 
2018年05月03日

冰說聰明:捷榮棄星回港之謎 - 青冰

捷榮主席黃達堂。資料圖片

平安好醫生(1833)明天上市,今天稍後時間就可以睇到暗盤表現,之前的新股短暫瘋狂但好快凋謝,好醫生如有好表現,對整體的股市氣氛都有幫助。
由於好醫生凍資太多,變相令捷榮(2119)孖展額大減,捷榮嘅業務大家肯定不陌生,今次青冰就講吓其他野。
捷榮由黃喬創立,現時的掌舵人黃達堂已屬第三代,根據招股書,捷榮01年在新加坡上市,09年大股東黃達堂首次提出私有化,但失敗而回,至2013年,再出價0.3075坡元私有化,結果成功了,當日仲話想2014年回港上市,結果搞到𠵱家。
私有化較值得留意的是,當日黃達堂持股約54%,但其他家庭成員也持有30%,不過根據2012年的新交所委員會的決定,裁定兩者並非一致行動人士,咁聽落已經有點家族糾紛的味道。翻查記錄,按當年的出價,黃達堂動用了1.8億港元去完成私有化,當中已經包括食埋家族成員的股份,按招股書所述,當日除牌時的市值係4億港元,咁如果今次成功上市呢,以招股價上限計,係15.8億港元,真係轉一轉場,市值升三倍,呢啲嘢港交所上市委員會都會問吓嘅,點解差咁多㗎?招股書就話,香港投資者需求較殷切及自2013年起公司發展急凍食品業務,整體收入及利潤產生正面作用。
急凍食品係唔係咁堅,可令市值急升,不作深究,不過我地哋股市場係癲,應該冇乜人反對。另一有趣地方,就係今次上市,大股東將會賣舊股,總數1.33億股,以招股價上限2.19元計,可套現2.9億港元,上市後大股東仍持有66%股權。諗深一層,大股東都係財技高手喎,5年前手執54%股權,最後用1.8億元私有化,今次賣完舊股都仲有66%股權,現金流相減,個袋仲要多咗1.1億,不其然要飲番啖咖啡,嘆一句爽呀。

青冰
http://fb.com/chingbing888
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載