› 選擇地區
三藩市
紐約
洛杉磯
其他美國地區
香港 台灣 北美
 
2018年05月08日

大棋局:2019大爭之世(完) - Mr. Tregunter

特朗普用貿易戰對付中國,代表中國對美國主導嘅世界秩序有威脅。
資料圖片

美國同中國打貿易戰之際,有一單大deal被忽略。美國司法部批准德國拜耳以625億美元收購美國孟山都,收購完成後,拜耳會揸住全世界25%種子同農藥市場。呢單deal點解重要?因為收購完成後拜耳會成為主宰全球種子同農藥市場嘅巨擘,造成壟斷,原本應該好難批,令呢單deal傾好耐。但美國司法部開綠燈,拜耳將科技作物部門以70億美元賣畀德國化工大廠巴斯夫,咁就唔係壟斷。貿易戰期間對德國巨企收購開綠燈,心水清的讀者自然明白咩事。
更重要係,中國的野心俾美國察覺。近年種子同農藥巨頭都在搞M&A,各大廠爭住做大佬。當美國陶氏化工收購美國杜邦農業部嘅時候,中國化工集團亦買下瑞士先正達,美國開始意識到中國想爭規則制定者之位,而且步步進迫。
共產黨建政後知道中國太落後,老老實實去追等到蚊瞓,要在國際上有碇企就要搞不對稱制衡戰略,所以國防上先搞兩彈一星,即核彈、導彈、人造衛星。現時中國航母得啖笑,戰機冇外國引擎連飛都唔使飛,但兩彈一星起碼有自保抗衡威懾力。中國現時思維一樣,覺得老老實實去打根基太慢,要打就打不對稱戰略,而且要行捷徑,其他慢慢嚟,但先發展AI,機械人,官方數字貨幣。以收購、合資等方式取得技術轉移,抄一次快過研究100年。貿易戰若講唔掂數,以下幾間公司有機會被重點招呼。

美國三路齊出圍堵中國

如果中國仍然好落後,美國話之你點搞。特朗普要用貿易戰對付中國,就代表中國對美國主導嘅世界秩序起碼稍有威脅。朝鮮似乎倒向美國,中國想尋求打開東北亞缺口失敗,咁美國下一步係伊朗,再下一步就係南海,西、南兩面封堵,一帶一路就變成空談。
80年代美國同日本打貿易戰,用上日本文藝片最常出現的道具:時間停止器。日本經濟仿若被凝結於80年代。今次對中國亦一樣,最終目的,係要將中國經濟凝結於2018年。伐謀、伐交、攻城上中下三路齊出;貿易戰、貨幣戰、地緣戰輪住嚟;美元萬劍歸宗、石油美元逆行,全方位攻擊。特朗普幕僚幾乎清一色鷹派,唔好以為佢哋食齋。
豐臣秀吉將要統一日本時,同德川家康打咗場小牧‧長久手之戰。德川軍只有豐臣軍三份一兵力,但以反奇襲打法令戰事陷入拉鋸。最後拖到豐臣秀吉有退意,明明自己比人強,點和談?豐臣秀吉私下同德川家康講,只要你認我做大佬,一切依舊。
(全文完)
上集重溫:
第一集( https://bit.ly/2Jux9Ql )
第二集( https://bit.ly/2uWOEFJ )
第三集( https://bit.ly/2HC0ZC3 )
第四集( https://bit.ly/2qR8KMo )
第五集( https://bit.ly/2JYZb5Q )

Mr. Tregunter
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載