› 選擇地區
三藩市
紐約
洛杉磯
其他美國地區
香港 台灣 北美
 
2018年05月09日

收市閒情:黃牛vs土地大辯論 - 千頌C

五月天演唱會,最勁試過炒高12倍,點知開場前夕,黃牛價插水,最平57折有售!

大家撲黃子華飛,撲到黃子華都眼火爆,於是林鄭突然就話研究炒黃牛飛刑事化,幾咁體恤民間疾苦,幾咁憂國憂民。喂,咁樓市呢?
即係咁,講到炒黃牛飛問題,如果主辦單位決心要解決嘅,冇話解決唔到。最近五月天演唱會,最勁試過炒高12倍,你點估到,開場前夕,黃牛價插水快過平收西醫生(平安好醫生:1833),最平57折有售!
市場價格由供求決定。話說今次演唱會主辦單位,開騷前個幾星期,突然皇恩浩蕩式加位派貨,一加就加一萬個。迪迪尼個場容納2萬人,開6場即係12萬個位,即係市場比原先街貨多咗9%!用股票去講,即係大股東貨源歸邊,然後由班細莊炒高,炒高價大股東散貨,價唔冧就奇;用樓市去講,簡單啲,董建華宣佈「八萬五」,樓市大冧,講完。
我唔知到底主辦單位係因為散唔晒貨,之後先加位;定咁有謀略,預先hold起飛,等你班黃牛買齊啦,就出絕招「八萬五」屠牛(理論上冇咁醒)?黃牛都可靠供應解決,咁香港樓價咁高,政府係咪真係有心解決供應問題先?
唔講咩搵地起樓,講樓花。上年首4個月,政府批出逾7,800伙樓花供應,今年頭4個月僅批出逾3,200伙,大減近六成,現時滾存待批的樓花1.48萬伙,創20個月高。港府話研空置稅,又成日話未來住宅單位落成會有幾多萬幾多萬……最弊你樓花審批都好慢,市場新供應順理成章拖慢推出。我係發展商,見街貨唔多,「傻㗎,點會唔劏你?」
開新土地,係遠水,救不了近火;至於樓花呢個近水樓台呢,又唔見得政府有做推動角色喎,點解?
香港樓長期咁貴,土生土長香港人住唔起,咁點呀?「唔怕!大家以後都係大灣區人,何不搬去大灣區其他城市呢,抵好多耶?」

千頌C
http://fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載