› 選擇地區
三藩市
紐約
洛杉磯
其他美國地區
香港 台灣 北美
 
2018年05月16日

收市閒情:中美貿易如「婆媳大戰」 - 千頌C

中美貿易戰博弈,根本就似一場「婆媳大戰」,最後咪手牽手,搞返掂。資料圖片

特朗普突然U-Turn放生中興(763),呢頭話要嚴懲,嗰頭話要同情。別人笑佢太瘋癲咩,只要咁睇你就看得穿,中美貿易戰博弈,根本就似一場「婆媳大戰」!

古往今來,婆媳大戰根本係一場Infinity War,無論係咩年代、咩時空,一直唔會完結嘅戰爭。對於奶奶來講,初歸新抱,登堂入室,同你爭仔喎,佢當然唔Gur;至於新抱仔,新婚燕爾當然Sweet Sweet,喺新屋攬住老公日對夜對,對奶奶有怨言時,即時發動枕頭狀功勢,盡享天時地利人和。

婆媳暗戰都尚可搞得掂,最慘發展到中美貿易戰咁明刀明槍,特朗普首先出招,「你侵犯我知識產權,我加你關稅!鋼,加25%!鋁,加10%!」習近平都唔弱,「你加我唔識加咩!128項進口商品,全部加!」「我大你!1,300樣!」「我再加106項商品,汽車、飛機,仲有大豆呀!問你死未!」

雙方拳來腳往,刀光劍影,就好似婆媳之戰咁「你點做人老婆架,洗到啲衫黑蚊蚊!仲要霸住我個囝。」奶奶拎起件衫掟去新抱度,新抱都唔輸蝕,指住食物殘渣,「奶奶,你夠成日喺我屋企食完嘢就咁走咗去啦……」「你家陣嫌我老啦,阿囝,你老婆嫌我啊,我冇用啦。」

過招千百回,你點估到特朗普出終極一招:「我搞你個中興!」果然,一份禁止出口令,成功將中興嘅脆弱赤裸裸曝露於人前。你幻想下,如果奶奶突然講一句,「我收返你哋層樓!」揸住你痛腳,令新抱記起,自己同老公根本冇咗奶奶唔得(除非你想供樓),於是你可以做咩?就算唔雙膝跪地,你都唔敢再駁咀,此時,奶奶就成功佔上風,而中國亦都當堂收收火。

特朗普出名係咩,出名在估佢唔到!你點估到佢,原來以進為退,無啦啦出個Tweet,寫「中興出事,搞到太多人失業啦,我會同習近平,手牽手,搞返掂」神奇!頂級!超卓!等如奶奶突然同你講,「新抱仔,見到你哋要供樓捱麵包咁慘,我決定伸出友誼之手,幫你渡過難關!」即係點呀?即係你走來打我一拳,然後同我講,見到你流晒血,我幫你包紮吖?又或者去捉啲海龜返嚟,然後去海放生佢,之後就覺得自己福有攸歸?

係好唔合邏輯架,特朗普之前不斷批評中國侵犯知識產權、貿易逆差、搶美國生意累就業市場,𠵱家反過來關心中國就業市場問題?完全唔Make Sense!不過你唔好理,特朗普一句放生,換來中國外交部一句:十分讚賞;而特生繼續有中興做談判籌碼,企圖換取消幾十億美元美國農產品進口關稅;更重要係,中國𠵱家當正自己係美朝之間嘅橋樑,喺美朝峯會前搞場大龍鳳後玩放生,中國應該唔敢太玩嘢。

如果你係新抱仔,見到奶奶打你一身後,懶仁慈咁望住你,再望一望層樓,你仲點敢唔聽話呢,「老公,我哋以後多啲同奶奶飲茶啦。」

by千頌C@堆填區
http://fb.com/winbigwok

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載