› 選擇地區
三藩市
紐約
洛杉磯
其他美國地區
香港 台灣 北美
 
2018年05月21日

經濟客艙:
大灣區嘅終極任務 - Captain Cool

政府鼓勵年輕人到大灣區置業,然後每日搭千億高鐵由廣州南站到香港返工。 互聯網圖片

粵港澳大灣區獲落力唱好前景及機遇,國家終於有任務畀我哋喇。近千億港元嘅廣深港高鐵嘅交通配套,又有多種發展機遇,仲鼓勵大家先到大灣區置業,然後每日搭千億高鐵返工嘅1小時生活圈等等,大家都畀呢種近乎洗腦式唱好大灣區嘅論調搞彎晒。
普遍港人1小時生活圈離不開港九新界,跨境返工,除非薪酬福利好,否則好難改變港人返工習慣。官方聲稱西九到廣州南站車程最快48分鐘,票價盛惠260港元。聽落好似幾快,睇返運輸署2011年嘅交通習慣調查,香港打工仔搭公共交通工具返工嘅時間約68分鐘。數字表面上係縮短咗約十分鐘,但並非每位港人同樣咁幸運,靠近西九高鐵站附近,也未計大家出門上落所需時間。
粵港澳大灣區嘅發展想媲美三藩市灣區、紐約灣區或東京灣區,估計要配合中國製造2025計劃。呢個周末有消息傳出內地政府有意畀外資公司參與中國製造2025計劃,初步合作為外資公司參與四年前設立嘅國家積體電路產業投資基金,協助發展自家研發嘅半導體業務或其他初創。
有咗大彎區,又有香港優秀嘅科技專才輸入,咪正正可以配合國家鴻圖大計。同時,政府又推行科技人才輸入,想一年內輸入千名內地同外地優秀嘅科研人手。目前好難有效評估種種新大計成效,但每項專才輸入及鼓勵港人走回內地發展嘅計劃,最怕達標不成,但資源錯配,扭曲晒一個城市嘅產業同人力資源,所帶來嘅影響同金融海嘯後造成嘅資產泡沫可謂不相伯仲。
Captain Cool
FB page: http://fb.com/seeforcaptain/

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載