› 選擇地區
三藩市
紐約
洛杉磯
其他美國地區
香港 台灣 北美
 
2018年05月21日

中環在線:
波叔叫港人上大灣區搞startup - 李華華

波叔上周去咗杭州創科研討會。

政府高官輪流sell大灣區概念,就同上遊戲節目一樣──「人人有份,永不落空」,今次輪到財政司司長陳茂波發功。波叔喺網誌上就話,港人搞startup(初創企業),就不妨諗諗大灣區,認為係一個好開始。
至於背後原因都係三幅被,即內地人口市場夠大、科技夠先進,「擁有6,800萬人口的粵港澳大灣區將會為香港提供一個便捷的大市場…背後還有13億人的內地市場,以至通過互聯網……」財爺筆下嘅大灣區如此美好,華華雖則隔住電腦屏幕,都感受到來自「國家嘅底氣」。

讚內地支付工具好用

財爺亦喺網誌上講到,內地電子支付好使好用,仲衍生出更多附加嘅增值服務,為生活更添方便,究竟係齋讚內地支付工具好用,抑或暗指八達通「冇進步過」,可能要問吓波叔先知。他仲提到,香港要發展創新科技,政府就要幫手構建一個有利嘅生態環境。根據政府歷年來對科技嘅支持,華華信啊,真係信!
題外話,根據唔完全兼唔科學嘅統計,諸位司局長當中,三分之二以上嘅司局長年內已經輪流發功唱好大灣區,至於未曾表態嘅「高幹」,就要快馬加鞭,好好跟隨領導走。

李華華

mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載