› 選擇地區
三藩市
紐約
洛杉磯
其他美國地區
香港 台灣 北美
 
2018年05月23日

Money Walker:做定期好過變財棍點心 - El.

銀行定期存款息率近期越搶越高,簡簡單單做定期收息,好過不知就裏成為財棍點心。資料圖片

定期存款息率近期越搶越高,拎住十萬八萬港紙分分鐘有大約兩厘年息率回報。定期吸引力增加對唔太熟悉投資嘅人係好事,事關買藍籌收息仍有機會坐艇,結構性產品息率高但風險更高,加上買樓收租嘅回報率跌至同定存差不多或更低,令到定期呢啲師奶仔選擇吸引力忽然增加。
聽銀行中人講,十幾年前樓市低迷但定存息率高過𠵱家,當年有啲退休人士拎住筆退休金又唔敢買樓收租,就會熱衷做定期。唔好以為做定期好簡單,除咗要勤力去唔同銀行格價,尤其是鎖定啲較高息嘅細S行之外,仲要諗吓點樣將啲存款由唔同銀行度調來調去,以符合享有新資金利息優惠嘅資格。
如果閣下筆存款金額夠大,更加可以直接同分行理財顧問講數,爭取再優惠啲嘅息率。聽落好笑但計落可以幾和味,試諗吓當你有二、三百萬退休金做定期,而年息率兩、三厘,個個月已經有三幾千落袋,慳慳哋勉強夠退休生活費。
以前嘅世代投資理財相對簡單,高息年代只係做吓定期已有唔錯回報。進取少少炒吓股,撞正香港經濟起飛年代,買一堆藍籌做長線投資,真係可以令你富足一生。當年老千股未橫行,買細價股扑中,做到以小博大亦唔係神話。
今時今日投資理財資訊較十年前氾濫,偏偏錢搵錢較以前難得多,亦因此間接造就咗好多財棍妖股老千等橫行,合法呃人。有時簡簡單單做個定期收息或者老人家做下年金,總好過不知就裏成為騙子嘅點心。

El.
http://fb.com/moneywalkerhk
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載