› 選擇地區
三藩市
紐約
洛杉磯
其他美國地區
香港 台灣 北美
 
2018年05月23日

財經評論:「股評人」濫竽充數

「股評人」千奇百怪,小投資者不要盲目盡信。資料圖片

時勢真惡!財經台、報章雜誌群魔亂舞,阿豬阿狗都係股評人,分享性質自然冇所謂,可惡在唔少老千乘勢出擊,開貴價股票班、收錢入facebook群組等巧立名目掠水,個別仲離譜到𠱁你課金畀佢落場玩,跣你一鑊甘。
請讀者莫誤會,筆者對股評人要求之低,已為道德淪喪之層次,只要你稍與財經扯上關係,即讀過吓金融經濟會計,或做過吓基金經理、分析員、會計師、相關科目嘅大學教授,甚至財經記者等,相信財經知識差極有譜,當中稍有道德者,都可教授他人正確投資觀念,勝任股評人。
就算乜都冇,有投資成績搭夠照殺。畢竟投資等同打功夫,不過「一橫一直」,股海大浪翻騰,企得返喺度嗰個先啱晒,係咪咁話?
弊在事實不然。現今講股佬千奇百怪,相關學歷經驗全無,不知哪裏冒出頭來,大模斯樣上電視台講股(電視台又肯?),仲自創神化投資交易系統,左堆右砌譁眾取寵,計量、趨勢,you name it,再將成長、價值投資全部溝成一碟,問你服未?
最令人疑惑,必係自封某某專家或獨立股評人一稱(前專家、半退休、轉工途中或不方便出名則不在此列,大包圍至此足見筆者無良),分明不務正業,失業人士變專家。最過癮係,一個專家連往績都冇(或者極差),照樣有羊牯自獻鮮肉,拜服乜sir物sir,學習所謂「絕密技巧」,甚至落疊揼錢投資。咁你都信?要知道,當你課金之時,佢已唔再係股評家,而係企業家;佢贏嘅亦唔再係市場,而係你口袋裏死慳死抵嘅人工!
筆者不是一味發洩,而係苦口婆心提醒。眼見年紀日長,離開校園後,身邊唔少老友都接觸投資,初哥白紙一張,最易受騙。騙徒手法層出不窮,呃人者自然本性難改,最令人痛恨則係傳媒行家,為追收視、點擊率而不把嚴關,捧紅了老千,卻苦了大眾股民。
記者:張浚浩

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載