› 選擇地區
三藩市
紐約
洛杉磯
其他美國地區
香港 台灣 北美
 
2018年05月28日

笑到最後:一條橋印證港樓難跌 - 高明

林鄭月娥政府用近廿億喺元朗起行人天橋,無疑係「炫富性救市措施」。 資料圖片

香港樓市30屋苑錄破頂;相反,港股隨中美貿易戰紓緩應破頂而不破,反而在橫行區無限輪迴。香港股樓背馳,原因自然係政府低調推出救市措施。
現時買樓最大嘅信心危機係有冇金融風暴。本欄早前已解釋過,香港起一條大橋嘅一部份已達千億,等同阿根廷一半嘅債務危機,證明一旦出事,香港大把錢救市。近日政府嘅救市方案,就係向立法會申請喺元朗起行人天橋並已獲工務小組通過,預算達17.85億元。呢一條「元朗大橋」,為本港樓市買家帶來信心保證。
中國傳媒近日開始關注國內債務危機,指出自2018年頭5個月,中國已經發生20宗債券違約事件,合計債券餘額為176億元人民幣(約216億港元)。中國香港只係中國境內一個唔係點用手機支付嘅落後城市,財力竟然大到喺一個非核心區元朗,用近廿億去起行人天橋。無知嘅人會話係大白象工程,高明反而知林鄭月娥政府此舉,為托樓價而來。若用國際金融角度理解,「元朗大橋」無疑係本港「炫富性救市措施」。
大鱷見香港起條行人天橋都18億元,肯定唔敢來港搞事!港股滲入大量中資股,當然無法直接受惠救市措施,但港樓則立即見效,18區齊齊破頂,因為根本唔需要怕加息可能引起嘅金融危機。
至於政府托市,係咪等於要立即跟政策買樓?當然唔係。因為近日有單新聞,東涌東環撻定,畢竟樓價狂升加上政策,買樓首先要有一兩球首期,然後要有份兩三萬月薪嘅工作,過咗呢兩個門檻先有資格傾,最終如因家人唔支持撻訂就唔抵。另一因素係估值,二手業主訂價肯定進取,估價未必足,簽約後先知估唔足要借財仔,甚至要撻更唔抵。即使政府托市,買唔起的話,亦無必要喺樓市形勢一片大好中撻訂輸錢。

高明
http://fb.com/bigricetea
本欄逢周一刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載